Epress.am Լուրեր Հայաստանից
Այսօր Կառավարության շենքի առջև բացօթյա առևտրի արգելքի դեմ կրկին բողոքի ցույց էր անցկացվում: Բողոքող քաղաքացիների հետ էին նաև «Ժառանգություն» կուսակցության պատգամավորներ Զարուհի Փոստանջյանը և Արմեն Մարտիրոսյանը:
Հիշեցնենք, որ նախորդ հինգշաբթի ոստիկանները կոպտորեն միջամտել են բողոքի ակցիային` հրելով և հարվածելով Փոստանջյանին ու Մարտիրոսյանին: Այսօր իրավիճակը հանգիստ էր, ոստիկանները չէին խոչընդոտում ակցիայի ընթացքին:
Այնուամենայնիվ, բողոքող առևտրականները Epress.am-ի հետ զրույցում պատմել են, որ մինչ ակցիայի մեկնարկը նրանցից մի քանի հոգու ոստիկանները բերման են ենթարկել.
«Նարինեին ու Հեղինեին են տարել` իրենց ծաղիկների հետ հանդերձ: Չգիտենք էլ ուր են տարել, տարել են, որ վախենանք, չգանք»,- ասել են կանայք:
Ակցիային ներկա էին նաև մի քանի տասնյակ ոստիկաններ ՊՊԾ գնդի պետի տեղակալ Խաչիկ Ավետիսյանի ղեկավարությամբ:
Ողջ ակցիայի ընթացքում պատգամավոր Զարուհի Փոստանջյանը հարցեր էր ուղղում Ավետիսյանին.
«Պարոն Ավետիսյան, այսօր Ձեր նկատմամբ որևէ մեկը բիրտ ուժ կիրառե՞լ է: Պարոն Ավետիսյան, դուք այսօր բռնության ենթարկվե՞լ եք: Պարոն Ավետիսյան, դուք վախեցա՞ծ եք, դուք վախենո՞ւմ եք, այսօր, մի շաբաթ առաջ, դուք վախեցա՞ծ եք: Պարոն Ավետիսյան, դուք վախի զգացում ապրե՞լ եք: Պարոն Ավետիսյան, դուք երազներ տեսնո՞ւմ եք, դուք լավ քնո՞ւմ եք: Պարոն Ավետիսյան, դուք երազներում սադրիչներ տեսնո՞ւմ եք: Պարոն Ավետիսյան, մենք Ձեզ հարցեր ունենք, ձեր կյանքի ու առողջության հետ կապված»:
Փոստանջյանն ակնարկում էր ոստիկանության հայտարարությունը, համաձայն որի մեկ շաբաթ առաջ պատգամավորները «խախտել էին հասարակական կարգը, անօրինական գործողությունների դիմել և ոչ պարկեշտ հասարակական վարքագիծ դրսևորել»:
Խաչիկ Ավետիսյանը ի պատասխան պատգամավորի հարցերին ասել է, որ բոլոր հարցերը կարող են ուղղել իրենց մամուլի ծառայությանը, և պատասխանել Փոստանջյանի մի հարցին միայն.
«Ի տարբերություն Ձեզ` ես լավ եմ քնում»:
Պատգամավորը մոտեցել է նաև կառավարության շենքի մոտ կանգնած մի խումբ քաղաքացիական հագուստով անձանց, և հարցրել, թե նրանք ինչ առաքելություն են կատարում.
«Բարև Ձեզ, դուք ցուցարա՞ր եք, դուք ի՞նչ եք անում այստեղ, ի՞նչ ծառայություն եք իրականացնում»: Հավաքվածները չեն պատասխանել Փոստանջյանի հարցերին: Պատգամավորը ենթադրել է, որ նրանք կարող են քաղաքացիական հագուստով ոստիկաններ լինել: