Ազատ արձակված քաղբանտարկյալը ելույթ ունեցավ Ազատության հրապարակում (թարմացվում է)

20:56 Քիչ առաջ Ազատության հրապարակ ժամանեց այսօր ազատ արձակված քաղբանտարկյալ Հարություն Ուռուտյանը: Խոսելով հարթակից` նա շնորհակալություն հայտնեց հավաքվածներին` նշելով, որ իր ազատ արձակումը ժողովրդի շնորհիվ է:

20:25 ՀԱԿ ներկայացուցիչների ելույթներն ընդմիջվում են երաժշտությամբ, որի հնչյունների ներքո ժողովուրդը պարում է:

20:20 Ազատության հրապարակում խոսել է ՀԱԿ համակարգող Լևոն Զուրաբյանը:

“Մենք անարյուն հեղափոխություն ենք ուզում: Այսօր Հայաստանում հնարավոր է առաջ գնալ ժողովրդի ազատ ճնշմամբ, և մենք այդ ճնշումը տանելու ենք մինչև հաղթանակ”, – հայտարարել է Լևոն Զուրաբյանը:

20:10 Արամ Մանուկյան.Դեռ ծանր գործ կա առջևում, ծանր պայքար է սպասվում. Խնդրում եմ վստահել Լևոն Տեր-Պետրոսյանին: Խնդրում եմ ենթարկվել ՀԱԿ-ի ղեկավարների խնդրանքներին և հայտարարություններին: Այժմ վայելեք Ազատության հրապարակը, քանի որ այսքան տարի չեք վայելել:

20:08 Ազատության հրապարակի հարթակից խոսեց Արամ Մանուկայնը: “Աչքներդ լույս, Ազատության հրապարակում ենք: Սա առաջին հանգրվանն է”, – ասել է Մանուկյանը:

19:58 Այս պահին Գագիկ Ջհանգիրյանը և Արամ Մանուկյանը պարում են բարձր երաժշտության ներքո:

19:25 Այս պահին Հայ Ազգային Կոնգրեսի ներկայացուցիչները տեղադրում են բարձրախոսները և համապատասխան տեխնիկական սարքերը ելույթները սկսելու համար: Մի խումբ մարդիկ հավաքվել են Րաֆֆի Հովհաննիսյանի շուրջ, վակարկում են “Րաֆֆի, Րաֆֆի” և “Միացում”:

19:18 Epress.am-ի լրագրող զրուցել  Ժառանգություն կուսակցության փոխնախագահ Ռուբեն Հակոբյանի հետ, ով Րաֆֆի Հովհաննիսյանի հետ գտնվում է Ազատության հրապարակում:  Հակոբյանն ասել է, որ իրենք այժմ կորոշեն իրենց հետագա քայլերը:

19:15 Լևոն Զուրաբյանը կոչ է անում հավաքվածներին զգույշ լինել և չվնասել երեխաների համար տեղադրված կառուսելները:

19:11 Լևոն Տեր-Պետրոսյանը ձեռքով ողջունել է մարդկանց, նրանք վանկարկում են “Ազատ, անկախ Հայաստան”, “Լևոն, նախագահ”:

19:08 Լևոն Տեր-Պետրոսյանը կագնած է Ազատության հրապարակի հարթակին:

19:05 Այս պահին Ազատության հրապարակ է մտնում Լևոն Տեր-Պետրոսյանը:

19:03 Ոստիկանական շղթան բացվել է, մարդիկ մտնում են Ազատության հրապարակ:

19:00 Այս պահին Զուրաբյանն ու Աֆյանը կրկին առանձնացել են ու բանակցություններ են վարում:

18:58 Epress.am-ի լրագրողը հայտնում է, որ այս պահին բաց են թողել ևս մեկ քաղբանտարկյալի` Ռոման Մնացականյանին: Հիշեցնենք, որ այսօր ավելի վաղ ազատ էր արձակվել քաղբանտարկյալ Հարություն Ուռուտյանը:

18:57 Ներսիկ Նազարյանը լրագրողների հետ զրույցում ասել է, որ իրենք նպատակ չունեն հատուկ փակել Ազատության հրապարակը, պարզապես այնտեղ այս պահին խաղահրապարակ է տեղադրված:  Նա նշել է, որ բանակցությունների ընթացքում պարզ կլինի ոստիկանության հետագա քայլերը:

18:56 Լևոն Զուրաբյանը լրագրողների հետ զրույցում նշել է, որ ինքը զրուցել է Սաշիկ Աֆյանի հետ` պահանջ ներկայացնելով թույլ տալ լիարժեք հանրահավաք անցկացնել Ազատության հրապարակում:

“Մենք կենտրոնական փողոցները փակ ենք պահելու այնքան ժամանակ մինչև չբավարարեն մեր պահանջը”, -ասել է Զուրաբյանը: Նրա փոխանցմամբ` Սաշիկ Աֆյանը դեռ պատասխան չունի:

18:50 Լրագրողների հետ զրուցում է Երևանի ոստիկանապետ Ներսիկ Նազարյանը:

18:49 Լևոն Զուրաբյանը սկսեց բանակցությունները Հայաստանի փոխոստիկանապետ Սաշիկ Աֆյանի հետ:

18:48 Այս պահին ընդդիմության հանրահավաքի մասնակիցները, որոնք երթով շարժվել են դեպի Ազատության հրապարակ, հասել են Մաշտոցի պողոտա և կանգնել են այնտեղ: Այս պահին Լևոն Զուրաբյանը  լրագրողների ուղեկցությամբ քայլում է դեպի Հյուսիսային պողոտայի կողմից Ազատության հրապարակի մուտքը փակած ոստիկանները` նրանց հետ բանակցությունները սկսելու նպատակով:

Հիշեցնենք, որ Հայ Ազգային Կոնգրեսի հանրահավաքին Լևոն Տեր-Պետրոսյանի ելույթից հետո ՀԱԿ համակարգող Լևոն Զուրաբյանը հայտարարեց, որ իրենք մտնում են Ազատության հրապարակ` իրենց սահմանադրական իրավունքը վերականգնելու նպատակով:

Զուրաբյանն ասել է, որ իրենց ներկայացուցիչը բանակցություններ է վարելու Ազատության հրապարակն արգելափակած ոստիկանների հետ, իսկ մինչ այդ ժողովուրդը սպասելու է Մաշտոցի պողոտայում: