Միջազգային կորպորացիան Երևանում «Նոյի գյուղ» կկառուցի

Երևանի քաղաքապետ Կարեն Կարապետյանը և «ԻՏԵՐԱ» միջազգային կորպորացիայի նախագահ Իգոր Մակարովը hամաձայնագիր են ստորագրել Երևանի քաղաքապետարանի և «ԻՏԵՐԱ» միջազգային կորպորացիայի միջև համագործակցության վերաբերյալ։ Այս մասին հաղորդում է Երևանի քաղաքապետարանի կայքը:
Կարեն Կարապետյանը նշել է, որ այս համաձայնագիրը փոխշահավետ գործակցության նոր սկիզբ է դնում. «Մեր համոզմամբ, մայրաքաղաքում ներդրումային դաշտը բավական մեծ է:  Կան ոլորտներ, որտեղ  կարելի է իսկապես շահավետ ներդրումներ  կատարել»,- ասել է քաղաքապետը:

«Մեզ համար մեծ պատիվ է Երևանում գտնվել  ու ներդրումներ կատարել քաղաքի զարգացման գործում»,- ընդգծել է Մակարովը:

Գնահատելով փոխադարձ հետաքրքրություն ներկայացնող ներդրումային առաջարկը` Մակարովը նշել է, որ այն երկարաժամկետ ու հեռանկարային  համագործակցություն է խոստանում:

Մասնավորապես, որոշակի փոփոխություններ են ակնկալվում  մայրաքաղաքի սպորտային կյանքում: Որպես ՌԴ հեծանվային սպորտի ֆեդերացիայի նախագահ և նույն մարզաձևի միջազգային ֆեդերացիայի փոխնախագահ` Մակարովը Կարեն Կարապետյանի հետ  այցելել են  կառուցվող նոր հեծանվահրապարակ,  քննարկել  են միջոցառումների ծրագիր, որը հնարավորություն կտա  այս ոլորտում  միջազգային բարձր կարգ ապահովել և համաշխարհային մակարդակի մրցումներ անցկացնել:
Ըստ ստորագրված համաձայնագրի, «ԻՏԵՐԱՆ»  պարտավորվում է 2011-2016թթ. մայրաքաղաքում ներդրումային խոշոր ծրագրեր իրականացնել զբոսաշրջության, առևտրի և հանրային սպասարկման, այգիների, կանաչ տարածքների զարգացման և մի շարք այլ ոլորտներում։
Նախատեսվում է մինչև 2016թ. մայրաքաղաքում կառուցել նոր բազմաֆունկցիոնալ կենտրոն և միջազգային չափանիշներին  համապատասխան բարձրակարգ հյուրանոց։ «ԻՏԵՐԱ»-ն կիրականացնի նաև «Նոյլենդ» («Նոյի գյուղ») զբոսաշրջային համալիրի կառուցումն ու մի շարք այլ նախագծեր։
Ծրագրերի ժամկետների վերջնական ժամանակացույցը կհստակեցվի առաջիկայում` բիզնես պլանների հաստատումից հետո։