Մուբարաքի կողմնակիցներն ու հակառակորդները քարեր են նետում միմյանց վրա

Եգիպտոսի նախկին առաջնորդ Հոսնի Մուբարաքի համախոհներն ու հակառակորդները խմբվել են դատարանի առջև, որտեղ քննվում էր նախագահի անունը բոլոր կառավարական ինստիտուտների փաստաթղթերից վերացնելու հարցը, հաղորդում է Associated Press-ը:

Ոստիկանությունը և դատարանի պաշտոնատար անձինք պատմել են, որ Հոսնի Մուբարաքի համախոհներից մոտ 200 հոգի նախագահի պատկերով պաստառներ են բերել դատարանի դիմաց: Այնտեղ հավաքվել են նաև Մուբարաքի շուրջ 300 հակառակորդներ: Երկու կողմերը սկսել են քարեր և ջրով շշեր նետել միմյանց ուղղությամբ նախքան ոստիկանությունն ու զինվորները կհասցնեին միջամտել:

Մի շարք պաշտոնատար անձինք հաղորդել են, որ որոշ մարդիկ վնասվածքներ են ստացել, թեև ոչ լուրջ բնույթի:

Մուբարաքի աջակիցները ասում են, որ Մուբարաքը Իսրայելի հետ 1973 թվականին տեղի ունեցած պատերազմի հերոս է և հարգանքի է արժանի: Հակառակորդներն էլ, ընդհակառակը, մեղադրում են Մուբարաքին քաղաքական բռնաճնշումների և կոռուպցիայի մեջ:

Դատական նիստը հետաձգվել է մինչև ապրիլի 14-ը: