Հայազգի շախմատիստները հաջող են խաղում Եվրոպայի առաջնությունում. հայաստանցիները` նահանջում են

Ֆրանսիական Էքս-Լը-Բեն քաղաքում շարունակվող Եվրոպայի շախմատի առաջնության ընթացքում հաջող ելույթ են ունենում հայազգի շախմատիստներ Տիգրան Ղարամյանն ու Արթուր Գաբրիելյանը, որոնք համապատասխանաբար ներկայացնում են Ֆրանսիան և Ռուսաստանը: Ղարամյանը երեկ հաղթանակ տարավ Չեխիայի ուժեղագույն շախմատիստ Դավիդ Նավարայի նկատմամբ, իսկ Գաբրիելյանը հաղթեց մոլդովացի Վիկտոր Բոլոգանին:

8 տուրից հետո նրանք երկուսն էլ 6-ական միավոր են վաստակել, և մրցաշարի  առաջատար 6 շախմատիստներին զիջում են ընդամենը կես միավոր:

Ինչ վերաբերում է Հայաստանը ներկայացնող գրոսմայստերներին, ապա նրանք շարունակում են ոչ այդքան հաջող ելույթ ունենալ: Ռոբերտ Հովհաննիսյանը, Արման Փաշիկյանը, Վլադիմիր Հակոբյանը, Գաբրիել Սարգսյանը, Ավետիք Գրիգորյանը, Սամվել Տեր-Սահակյանը վաստակել են 5 միավոր և այս պահին դուրս են մնում մրցաշարի 50 ուժեղագույն շախմատիստի շարքից:

Այսօր կկայանան մրցաշարի 9-րդ տուրի հանդիպումները: