Օբաման այս տարի ևս չի արտասանի «ցեղասպանություն» բառը. Կիրո Մանոյան

Անցած տարվա հիմնական առաջընթացն այն է, որ ավելի շատ սկսեց խոսվել Հայոց Ցեղասպանության հետևանքների վերացման կամ հատուցման հարցի մասին, այսօր լրագրողների հետ հանդիպման ժամանակ ասել է ՀՅԴ Հայ դատի և քաղաքական հարցերի գրասենյակի պատասխանատու Կիրո Մանոյանը:

Նրա խոսքով` Հայաստան-Թուրքիա արձանագրությունները ողջ, թեկուզ կոմայի մեջ, պահելը հնարավորություն տվեց Թուրքիային շարունակել օգտագործել այդ արձանագրությունները որպես լծակ` Ղարաբաղյան հարցում իր տեսակետները ավելի բարձրաձայնելու: Մյուս կողմից, ըստ Մանոյանի, այդ արձանագրությունները մեկնաբանվում են ավելի շուտ Թուրքիայի տեսակետին համահունչ:

Դաշնակցական գործիչը նաև կարծիք է հայտնել, որ ԱՄՆ նախագահ Բարաք Օբաման այս տարի ևս չի արտասանի «ցեղասպանություն» բառը: Իսկ ինչ վերաբերում է նրան, թե ինչ հանգամանքներում Թուրքիան կարող է ճանաչել Հայոց Ցեղասպանությունը, Մանոյանը վստահեցրել է, որ դա կարող է լինել միայն արտաքին ճնշման ազդեցությամբ կամ Թուրքիայում ներքին փոփոխության արդյունքում: