Epress.am Լուրեր Հայաստանից
«Հայկական ժամանակ» օրաթերթի գլխավոր խմբագիր Նիկոլ Փաշինյանը պատրաստվում է օրերս հանդիպել ՀԱԿ անդամ Վարդգես Գասպարիի հետ և զրուցել մայիսի 31-ին տեղի ունեցած միջադեպի մասին: Այս մասին Փաշինյանը հայտարարել է այսօր լրագրողների հետ հանդիպմանը:
Հիշեցնենք, որ մայիսի 31-ին ՀԱԿ-ի հանրահավաքի ժամանակ Գասպարին պահանջել էր հարթակից հեռացնել նախկին քաղբանտարկյալ Արա Հովհաննիսյանին, ով ազատ էր արձակվել մայիսի 27-ին՝ կիրառված համաներման արդյունքում: Գասպարիի խոսքով՝ Հովհաննիսյանը բանտում ստորացրել է այլ քաղբանտարկյալներին և բանտարկյալներին, ինչն անընդունելի է Շարժման համար:
«Վարդգես Գասպարին իմ եղբայրն է, նրա նվիրվածությանը Շարժմանը ես նվազագույնս անգամ չեմ կասկածում: Երբ Գասպարին ինչ-որ բան է ասում, ես շատ ուշադիր եմ լսում, ես ուԳասպարին երեկ էլ հեռախոսով խոսել ենք: Վարդգեսը ինձ համար անառարկելի հեղինակություն է, Գասպարի ասելով` մենք հասկանում ենք անբասիրություն», – նշել է Փաշինյանը:
Այսօր կայացած ասուլիսի ժամանակ այդ թեմային անդրադարձել է նաև ՀԱԿ ներկայացուցիչ Դավիթ Շահնազարյանը:
«Արա Հովհաննիսյանը քաղաքական դրդապատճառներով է ձերբակալվել, մարդկային տեսակը որևէ կապ չունի այն հարցի հետ, որ նա քաղաքական դրդապատճառներով է ձերբակալվել, իսկ այլ հարցերն արդեն այլ բնույթի են», – ասել է Շահնազարյանը:
Նա նաև հավելել է, որ խորապես հարգում է Վարդգես Գասպարիին և նրա սկզբունքայնությունը: