Գլենդեյլի հրշեջ ծառայությունում խոստանում են ավելի շատ հայերի ընդգրկել

Ամերիկյան Գլենդեյլ քաղաքի հրշեջ ծառայության պաշտոնյաները հանձնաժողով կստեղծեն, որը, ուսումնասիրելով քաղաքի ժողովրդագրական վիճակը, մեթոդներ կմշակի տարբեր էթնիկ խմբերը ներկայացնող անձանց աշխատանքի ընդունելու համար:

«Մենք հասկանում ենք այն խնդիրները, որին բախվում ենք մարդկանց աշխատանքի ընդունելիս»,-հայտարարել է հրշեջ ծառայության ղեկավար Հարոլդ Սկոգինսը քաղաքի բյուջեի քննարկման ժամանակ:

«Մենք գիտենք, որ համայնքը ուշադրություն է դարձնում այս հանգամանքին», – նշել է նա` նկատի ունենալով մարդկանց ծագումը:

Քաղաքային խորհրդի անդամ Րաֆֆի Մանուկյանն իր մտահոգություն է արտահայտել գերատեսչության կողմից մարդկանց աշխատանքի ընդունման գործընթացի վերաբերյալ` նշելով, որ Գլենդեյլի հրշեջ ծառայության նախկին ղեկավար Քրիստոֆեր Գրեյը դեռ 10 տարի առաջ վստահեցրել էր իրեն, որ ավելի մեծ թվով ազգությամբ հայ հրշեջներ կընդունվեն աշխատանքի:

«10 տարի անց արդյունքները հավասար են զրոյի»,- ասել է Մանուկյանը:

Այնուամենայնիվ, Սկոգինսը նշել է, որ գերատեսչությունն այդուհանդերձ առաջընթաց է գրանցել` վերջին տասը տարիների ընթացքում աշխատանքի ընդունելով ազգությամբ հայ մեկ կին և չորս տղամարդ հրշեջների:

Աշխատակիցների 40 %-ը տարբեր էթնիկ խմբերի ներկայացուցիչներ են, այդ թվում` աֆրիկացիներ, հայեր, կորեացիներ, նշել է Սկոգինսը:

«Կարծում եմ, մեր գործունեությունը արդյունքներ է տալիս: Բայց այդ արդյունքները պետք է ծառայեն ոչ միայն ամերիկահայերին, այլև մի շարք այլ էթնիկ խմբերին»,- նշել է Սկոգինսը:

Նշենք, որ ԱՄՆ Կալիֆորնիա նահանգի Գլենդեյլ քաղաքի բնակչությունը կազմում է 191,000 մարդ, որից 53,000-ը հայեր են: