Ռուսաստանում կքննարկեն Գյումրիի ռազմակայանների հարցը

Այսօր ՌԴ Պետդուման կքննարկի 1995 թվականից Գյումրի քաղաքում տեղակայված ռուսաստանյան ռազմակայանի մասին երկկողմանի համաձայնագրում փոփոխություններ մտցնելու վերաբերյալ արձանագրությունը, որը վերաբերում է փաստաթղթի ժամկետների երկարաձգմանը, հայտնում է “ՌԻԱ Նովոստի»-ն:

Արձանագրությունը ստորագրվել էր Երևանում 2010 թվականի օգոստոսին: Պայմանագիրը ուժի մեջ պիտի լիներ 25 տարի, արձանագրությունը երկարաձգում է համաձայնագրի ժամկետները մինչև 49 տարի (սկսած 1995-ից):

Փոփոխությունների համաձայն` համաձայնագրի` ուժի մեջ լինելու ժամկետները յուրաքանչյուր անգամ մեխանիկորեն երկարաձգվելու են 5 տարով, եթե կողմերից ոչ մեկը գրավոր կերպով չտեղեկացնի մյուս կողմին 6 ամսյա ժամկետներում, որ մտադիր չէ երկարաձգել համաձայնագիրը:

Քանի որ ռուսաստանյան ռազմակայանը Հայաստանում լինելու ընթացքում, բացի ՌԴ-ի շահերը պաշտպանելուց, հայկական ռազմական ուժերի հետ ապահովում է Հայաստանի անվտանգությունը, ռուսաստանյան կողմը, փաստաթղթի համաձայն, պարտավորվում է հայկական կողմին ժամանակակից և համատեղ սպառազինությամբ և ռազմական տեխնիկայով ապահովել: