Երթուղայինների ուղևորներին կբացատրեն կանգնած երթևեկելու վտանգները

Այսօր ժամը 19:00-ին Երևանի Օպերայի և բալետի շենքի հարակից կանգառում (դեպի Բաղրամյան պողոտա գնացող) տեղի է ունենալու ակցիա, որը նախաձեռնել են «Արժանապատիվ տրանսպորտ» քաղաքացիական նախաձեռնության անդամները:

Կազմակերպիչները պատրաստվում են պաստառներով լուռ կանգնել կանգառում և հետաքրքրվողներին տեղեկատվական թերթիկներ բաժանել երթուղայիններում կանգնած երթևեևկելու վտանգների մասին:

Հիշեցնենք, որ հուլիսի 1-ին նախաձեռնության անդամները Երևան քաղաքի կենտրոնում ստորագրահավաք էին կազմակերպել, որից հետո հավաքված 15 ստորագրություններով նամակ էր ուղարկվել «Հայավտոկայան» ՓԲԸ-ի տնօրենին, որպեսզի իրենց ներկայացվեն բոլոր երթուղայինների չվացուցակները:

Իսկ մայիսի 15-ին նախաձեռնող Արման Ղարիբյանը գրավոր հարցում էր մուտքագրել Տրանսպորտի և կապի նախարարություն, որով խնդրել էր տրամադրել տեղեկություններ Հայաստանի Հանրապետության ամբողջ տարածքում գործող տրանսպորտի (բացառությամբ մետրոյի) փոփոխությունների/բարեփոխումների վերաբերյալ:

Ի պատասխան իրենց հայտնել էին, որ ՀՀ տրանսպորտի և կապի նախարարության կողմից տրանսպորտի բնագավառի օրենսդրությունը և դրանում կատարվող փոփոխությունները (նախագծերը) տեղակայված են www.mtc.am ինտերնետային կայքէջում:

Նախաձեռնության անդամները նշել էին, որ նախարարի տեղակալը, ըստ էության, չի պատասխանել իրենց հարցմանը, քանի որ իրենք չէին խնդրել տրանսպորտի բնագավառի օրենսդրությունը և դրանում կատարվող փոփոխությունները, այլ ցանկանում էին տեղեկանալ այդ տրանսպորտի ոլորտում սպասվող փոփոխություններին և բարեփոխումներին:

«Փաստորեն, խախտվել է քաղաքացու տեղեկատվություն ստանալու ազատության իրավունքը, որը երաշխավորված է ինչպես ՀՀ Սահմանադրությամբ, այնպես էլ «Տեղեկատվության ազատության մասին» ՀՀ օրենքով»,- նշված է նախաձեռնության տարածած հաղորդագրության մեջ: