ԲՀԿ-ականը «հայ երիտասարդության անունից» խնդրել է Պուտինին գալ Հայաստան

Ռուսաստանում ավանդաբար ամռանն անցկացվող «Սելիգեր 2011» երիտասարդական հավաքի ընթացքում ՌԴ վարչապետ Վլադիմիր Պուտինը պատասխանել է հավաքի մասնակիցների հարցերին, այդ թվում զրուցել է նաև Հայաստանից մեկնած Անի Ալավերդյանի հետ:

Վերջինս նշել է, որ ինքը ներկայացնում է «Բարգավաճ Հայաստան» կուսակցությունը, և հրավիրել է Վլադիմիր Պուտինին այցելել Ծաղկաձորում կայանալիք ԱՊՀ երկրների երիտասարդական համաժողով:

«Հայ երիտասարդության անունից խնդրում ենք աջակցել մեզ և այցելել Ծաղկաձոր», – Ալավերդյանի խոսքերն է մեջբերում ՌԴ կառավարության կայքը:

Պուտինը հետաքրքրվել է, թե երբ է անցկացվելու երիտասարդների հավաքը և հարցրել է` արդյոք այն ամենամյա է:

Ալավերդյանը պատասխանել է, որ հավաքը Հայաստանում անցկացվում է առաջին անգամ և այն նախատեսված է օգոստոսի 20-ին:

«Ցանկանում եմ հայ երիտասարդների անունից… Խնդրում եմ, այցելեք մեզ», – ասել է Ալավերդյանը:

Պուտինը խոստացել է մտածել այդ մասին:

Նշենք, որ ավելի վաղ «Հայաստանի երիտասարդական կառավարություն» նախաձեռնությունն իր ֆեյսբուքյան էջում նույն խնդրանքով դիմել էր Ռուսաստանի վարչապետին:

Խմբի հայ օգտատերերը կոչ էին անում բոլորին ակտիվ լինել, որպեսզի «Պուտինը լսի մեր խնդրանքը, ցանկությունը և մասնակցի այս տարվա երիտասարդական ֆորումին»:

«Հայաստանի երիտասարդական կառավարության» պաշտոնական կայքը տեղեկացնում է, որ երիտասարդների հավաքը «անցկացվելու է օգոստոսի 20-ից 30-ը` «Բարգավաճ Հայաստան» կուսակցության նախագահ Գագիկ Ծառուկյանի բարձր հովանու ներքո»: Հավաքի ընթացքում անկացվելու են տարատեսակ դասընթացներ, ժամանցային միջոցառումներ, մրցույթներ և այլն: