Հայաստանցիները կես կիլոգրամ ոսկի են անցկացրել Վրաստանի սահմանով

Մաքսանենգ ճանապարհով մեծ ծավալների ոսկյա զարդեր Վրաստան փոխադրելու մեջ մեղադրանքով ձերբակալվել են Հայաստանի քաղաքացիներ Կարեն Մելիքյանը, Արայիկ Պարոնյանը և Գարեգին Հովհաննիսյանը:

Ինչպես «Кавказ-Пресс»-ին հայտնել են Վրաստանի ֆինանսների նախարարության հետաքննչական ծառայությունից, տվյալ անձինք Վրաստանի տարածք են տեղափոխել 500 գրամ ոսկյա իրեր և առանց մաքսային տուրքի վճարման կարողացել են հասցնել այն մինչև Մարնեուլի շրջան: Հետաքննչական ծառայության աշխատակիցների կողմից առգրավված մաքսանենգ ապրանքները 31000 լարի (մոտ 7 մլն դրամ) են գնահատվել:

Դեպքի առնչությամբ քրեական գործ է հարուցվել: Մեղքի ապացուցման դեպքում Հայաստանի քաղաքացիներին 8-11 տարվա ազատազրկում է սպառնում: