Home / Հայաստան / Բաց ասուլիս. Ինչպես հարցեր ուղղել Լևոն Տեր-Պետրոսյանին (թարմացվում է)

Բաց ասուլիս. Ինչպես հարցեր ուղղել Լևոն Տեր-Պետրոսյանին (թարմացվում է)

Հոկտեմբերի 3

Երեկ ՀԱԿ առաջնորդ Լևոն Տեր-Պետրոսյանը հայտարարել է, որ ցանկացողները կարող են իրեն հարցեր ուղղել, իսկ ինքը կամ համապատասխան մասնագետները կպատասխանեն դրանց այսօրվա հանրահավաքի ընթացքում: ՀԱԿ-ի մամուլի ծառայությունը հայտարարել է, որ հարցերը կարելի է ուղղել levonpresident2008@gmail.com էլեկտրոնային փոստի հասցեով, ինչպես նաև Twitter-ի միջոցով` www.twitter.com/ancongress հասցեով և SMS հաղորդագրության միջոցով` 093 13 05 15 հեռախոսահամարով:

Հոկտեմբերի 2

20:32 Արման Մուսինյանը նշել է, որ լրագրողները նույնպես կարող են ուղարկել իրենց հարցերը էլեկտրոնային փոստով:

20:28 Լևոն Տեր-Պետրոսյանը առաջարկում է հանրահավաքի մասնակիցներին մինչև վաղը գրավոր հարցեր պատրաստել, որոնց ինքը կպատասխանի: Տեր-Պետրոսյանի խոսքով` ինքը կպատասխանի թե քաղաքական, թե անձնական բնույթի հարցերին:

“Ես վստահ եմ` դուք վաղը մեծ գեղագիտական հաճույք եք ստանալու”, – ասել է Տեր-Պետրոսյանը:

Վաղը կայանալու է Տեր-Պետրոսյանի բաց ասուլիսը, որտեղ, ինչպես նշել է ընդդիմության առաջնորդը, ներկա են լինելու նաև այլ մասնագետներ, ովքեր նույնպես պատրաստ կլինեն պատասխանել բոլոր հարցերին:

20:09 Հանրահավաքին իր ելույթն է սկսել Լևոն Տեր-Պետրոսյանը:

19:28  Նիկոլ Փաշինյանն առաջարկեց ծափահարել Ազատության հարապարակի մաքրությամբ զբաղվողներին:

19:05 Խոսում է դերասան Աշոտ Ադամյանը.  Այն ամբողջ տարածքը, որ կոչվում է մշակութային տարածք, պետք է հագեցած լինի սթափ, մտածող պրոֆեսիոնալներով: Հիմա  ձգտում են սատկացնել պրոֆեսիոնալներին, դրա պատճառով մենք կունենանք սիրողական երկիր, բայց ժողովուրդն ուզում է ունենալ բարձրակարգ երկիր: Ոչ ոք իրավունք չունի անգրագետ լինելու:

18:50 Նիկոլ Փաշինյան. Ուշադիր նայեք իմ աչքերին, մի՞թե մենք գործարքի գնացող ենք: Ես ունեմ տասնմեկ տարեկան որդի: Եթե նա ապրի այն զգացողությամբ, ինչ Արթուր Բաղդասարյանի որդին, ես ինքնասպանություն կգործեմ:

18:43 Լևոն Տեր-Պետրոսյանը ժամանեց Ազատության հրապարակ:

17:33 Մոտ մեկ ժամից նախատեսվում է ընդդիմության առաջնորդ, ՀՀ առաջին նախագահ Լևոն Տեր-Պետրոսյանի ելույթը, որը Epress.am-ը կներկայացնի օնլայն տարբերակով:

17:30 Ազատության հրապարակում ընդդիմադիր Հայ Ազգային Կոնգրեսի համակիրները շարունակում են շուրջօրյա հանրահավաքներ անցկացնել:

 

Հոկտեմբերի 1

20:15 Ընդդիմության առաջնորդ Լևոն Տեր-Պետրոսյանի ելույթն ավարտվեց: Այս պահին Ազատության հրապարակում հնչում է քոչարին, մարդիկ պարում են: Հարթակի վրա Կոնգրեսի ակտիվիստների հետ քոչարի է պարում նաև Նիկոլ Փաշինյանը:

20:03 Տեր-Պետրոսյան. Հաջորդը ԲՀԿ-ի մասին է: ԲՀԿ-ն հայտարարեց, որ մենակ է գնալու ընտրությունների և որ իր գլխավոր մրցակիցը տեսնում է ՀՀԿ-ին:

Սա մի կողմից լավ է, որ մրցակցություն է առաջանում, ՀՀԿ-ի մոնոպոլիան վերանում է: ԲՀԿ-ն շատ ավելի բնական կուսակցություն է, գտնվեց մի լիդեր, որն իր տնտեսական կարողություններով կարողացավ որոշակի բաների հասնել: Իր համակիրների բանակը ստեղծեց, որը հայաստանածին է:

Չի կարելի հաշվի չնստել այս ուժի հետ, ես համարում եմ, որ մենք ավելի շատ հաշվի պիտի նստենք ԲՀԿ-ի հետ, քան ՀՀԿ-ի, քանի որ վերջինս օպորտունիսնտերի մի խումբ է:

20:00 Տեր-Պետրոսյան. Ո՞րն է մեր մամուլի ամենաշատ շրջանառվող թեման: Դա Ռոբերտ Քոչարյանի վերադարձի թեման է: Ինձ համար սա շինծու թեմա է, որովհետև որևէ բանական մարդու համար Ռոբերտ Քոչարյանն արդեն մարած քարտ է: Նա քաղաքական գործիչ չէ և երբեք չի եղել: Նա երբեք որևէ կուսակցության կամ համակարգի շնորհիվ կամ ժողովրդական հենարանի շնորհիվ քաղաքականություն չի եկել: Նա կարողացել է միշտ հարմարվել ինչ-որ սիստեմի: Սովետի ժամանակ` Սովետի սիստեմին, ՀՀՇ-ի ժամանակ` ՀՀՇ-ի սիստեմին: Էդտեղ իմ սխալն էլ կա, մեր իշխանության մեջ մտավ, հիմա նա խոսում է իր վերադարձի հնարավորության մասին: Չգիտեմ, այդ մարդը լուսնի վրա է ապրում, որտեղ է ապրում: Ժողովուրդը որքան հիմար կամ մազոխիստ պիտի լինի, որ պահանջարկ ներկայացնի մի մարդու, որը գնդակոծել է իրեն: Նա միայնակ ու դժբախտ մարդ է: Նա միակ մարդն է, որ գիշերները չի կարող հանգիստ քնել: Նա այնպիսի հանցանքներ է գործել, որ չի կարող հանգիստ ապրել: Նա կարող է նաև ոչ խելամիտ քայլեր անել, որից մեկը նրա երեկվա հայտարարությունն է: Դա մեզ համար պրոբլեմ չէ, և եթե պրոբլեմ է` միայն պրոբլեմ է Սերժ Սարգսյանի համար:

Հարյուր տոկոսով համոզված եմ, որ Դաշնակցությունը երբեք չի մտնի ուրիշի արյունը թափած ուժի տակ, նույնը չի անի ԲՀԿ-ն: Նրանք հիմար չեն, որ իրենց անունը կապեն Ռոբերտ Քոչարյանի հետ:

Կարող է Վարդան Օսկանյանը եղբայրանալ Քոչարյանի հետ, դա հասկանալի է: Ես այս թեման ավարտեցի և այլևս չեմ անդրադառնա Քոչարյանին, այլևս չեմ խոսի, դուք էլ մոռացեք, խնդրում եմ, այդպիսի գործոն գոյություն չունի:

19:56 Ազատության հրապարակը եղել է իրական համալսարան, որտեղ ժողովուրդը գիտելիքներ է ստացել, որտեղ մենք ոչ միայն ձեզ սովորեցրել ենք, այլ ավելի շատ ձեզանից ենք սովորել, և հիմա էլ սովորում ենք: Հիմա ձեր երրորդ համալսրանն է. ես մի փոքր համալսարանական դասընթաց կանցկացնեմ ձեզ հետ:

19:38 Խոսափողին է մոտեցել Լևոն Տեր-Պետրոսյանի տիկինը` Լյուդմիլա Տեր-Պետրոսյանը:

19:24 Տեր-Պետրոսյան. Ոստիկանությունն ասում է` այս հավաքն անօրինական է և դրա կազմակերպիչները պատասխանատվություն կկրեն: Այսինքն` մեզ, ինձ է ուղղված: Ես դա գիտեմ, 88-ին նույնն էր: Ես գիտեմ` ինչ պատասխանատվություն եմ կրելու: Ընդամենը դրա համար տուգանք է հասնում: Ես այդ տուգանքը կվճարեմ, պատրաստ եմ: Գորբաչյովը երեք անգամ ինձ տուգանել է` մի անգամ երկու հարյուր ռուբլի, երկրորդ անգամ չորս հարյուր, երրորդ անգամ` դրա կրկնակին: Այդ նույն դատավորները, որ տուգանել էին ինձ, իրենց գրպանից վճարել էին տուգանքը:  Խնդրում եմ, հասկացեք (դիմում է ոստիկաններին), ես ձեր փոխարեն ձեր պատգամը փոխանցեցի, դադարեք այդ բարձրախոսով կոչերը: Մենք բութ չենք, ես երկու դիսերտացիա եմ պաշտպանել, հասկացա, շնորհակալություն:

19:21 Լևոն Տեր-Պետրոսյան. Մենք հավաքվել ենք այս հրապարակում ոչ թե կրքեր բորբոքելու, եկել ենք գործ անելու:

19:17 Սասուն Միքաելյանի ելույթի ժամանակ Լևոն Տեր-Պետրոսյանը մոտեցավ խոսափողին և գոռաց. “Սասուն”:

18:55 Նիկոլ Փաշինյանը խոսել է այն մասին, որ Ազատության հրապարակի շուրջ բոլոր զուգարանները փակ են:

“Ժողովուրդ, կարող ա` իրիկվա կողմ օդի վինտիլներն էլ փակեն”, – ասել է նա:

18:45 Լևոն Տեր-Պետրոսյանը ժամանեց Ազատության հրապարակ և բարձրացավ հարթակ:

17:47 Ժամը 18:30-ին Ազատության հրապարակում կմեկնարկի ՀԱԿ առաջնորդ Լևոն Տեր-Պետրոսյանի ելույթը:

17:00 Մոտ երկու ժամ է, ինչ Երևանի քաղաքապետարանն անջատել է myyerevan.am կայքում տեղադրված տեսախցիկը, որով ուղիղ եթերում կարելի է հետևելօ, թե ինչ է կատարվում Ազատության հրապարակում: Քաղաքի այլ վայրերում տեղադրված տեսախցիկները գործում են անխափան:

16:33 Ազատության հրապարակում ոստիկանները բարձրախոսներով սկսեցին հայտարարել, որ հավաքն ապօրինի է: Մարդիկ միացրեցին երաժշտությունը և սկսեցին պարել, ապա Լևոն Զուրաբյանը կրկին զգուշացրեց հավաքվածներին, որ ոստիկանների հետ իրավունք ունեն շփվել միայն չորս անձ` ինքը, Դավիթ Մաթևոսյանը, Դավիթ Շահնազարյանը, Ավետիս Ավագյանը, և խնդրեց չարձագանքել ոստիկաններին և շփման մեջ չմտնել:

16:19 Լևոն Զուրաբյանն անդրադարձավ միջքաղաքային տրանսպորտի աշխատանքի խափանման խնդրին` նշելով, որ իշխանությունները «ամեն ստոր քայլի են դիմում», որ հանրահավաքին քիչ մարդ գա:

16:11 Խոսելով ՀՀ երկրորդ նախագահ Ռոբերտ Քոչարյանի` մեծ քաղաքականություն հնարավոր վերադարձի մասին` Նիկոլ Փաշինյանը հիշեցրել է Քոչարյանի խոսքերն այն մասին, որ ինքը կվերադառնա մեծ քաղաքականություն, եթե նրան կանչի ժողովուրդը: «Ժողովուրդը կկանչի նրան…  քրեական պատասխանատվության»,- ասել է Փաշինյանը:

16:05 Արամ Մանուկյանը Ազատության հրապարակի հարթակից բոլոր քաղաքացիներին, ինչպես նաև, իր խոսքով, «խոհանոցային և բազմոցային» ընդդիմությանը գալ Ազատության հրապարակ:

15:41 Ժամը 15:00-ին Ազատության հրապարակում մեկնարկած ելույթների ժամանակ հրապարակում հավաքված մարդիկ շնորհակալություն հայտնեցին իրենց հետ գիշերն անցկացրած ոստիկաններին` ծափահարելով վերջիններիս: Նման կերպ նրանք արձագանքեցին Նիկոլ Փաշինյանի խնդրանքին:

«Որպես գիշերն այստեղ անցկացրած քաղաքացի` ես չեմ բողոքում ոստիկանների աշխատանքից: Ընդհակառակը` նրանք ողջ գիշեր աչք չկպցրեցին` ապահովելով մեր անվտանգությունը», – ասել է Փաշինյանը:

13:22 Ազատության հրապարակի հարակից սրճարաններից մեկի կախովի ծածկը, որի տակ անձրևից պատսպարվում էին շուրջօրյա հանրահավաքի մասնակիցները, այս պահին ապամոնտաժվում է:

12:55 Ազատության հրապարակում մարդիկ խմբերով կանգնած զրուցում են:

Նիկոլ Փաշինյանը դիմել է ոստիկաններին` խնդրելով նրանց հարցեր ունենալու դեպքում կապվել ՀԱԿ համակարգող խմբի անդամների կամ անձամբ իր հետ:

12:34 Լևոն Տեր-Պետրոսյանը քայլում է Ազատության հրապարակում. Տեսանյութը` այստեղ:

11:45 Հայ Ազգային Կոնգրեսի առաջնորդ Լևոն Տեր-Պետրոսյանը շրջում է Ազատության հրապարակում, զրուցում է հավաքվածների հետ:

11:17 Ազատության հրապարակի հարակից սրճարաններից սկսել են հավաքել աթոռները:

10:50 Ազատության հրապարակում երաժշտություն է հնչում: Հայկական երգերի հետ մեկտեղ հնչում է նաև Մորիս Ռավելի “Բոլերոն”:

10:49 Ազատության հրապարակ են գալիս մարդիկ, ովքեր չեն գիշերել այնտեղ: Յուրահատուկ հերթափոխ է կատարվում: Մարդկանց թիվը կամաց-կամաց ավելանում է:

10:30 Ազատության հրապարակում մոտ 30 վրան կա: Արթնանալուց հետո մարդիկ մաքրեցին շրջակա տարածքը:

09:30 Այսօր առավոտյան Ազատության հրապարկում գիշերն անցկացրած ընդդիմության կողմնակիցներին ողջունել է ՀԱԿ ներկայացուցիչ Նիկոլ Փաշինյանը: