Թունիսում կայացել են առաջին ժողովրդավարական ընտրությունները

Կիրակի Թունիսում անց են կացվել երկրի պատմության մեջ առաջին ժողովրդավարական ընտրությունները: Երկրի խորհրդարանական ընտրություններին մասնակցել է թունիսցիների 90 տոկոսը:

Նոր օրենսդիր մարմինը պետք է նաև նոր սահմանադրություն մշակի և Թունիսի անցումային կառավարությունը ձևավորի:

Մի շարք փորձագետների գնահատմամբ`առավել մեծ թվով ձայներ կստանա իսլամիստական «Էն-Նախդա» կուսակցությունը, որի գործունեությունն արգելված էր նախկին բռնապետ առաջնորդ Զին բեն Աբիդին Բեն Ալիի ժամանակ:

Մինչ ընտրությունները Թունիսի ներկայիս վարչապետ Բեջի Կայիդ Սեբսին վստահեցրել էր երկրի քաղաքացիներին, որ նրանք կարող են կատարել իրենց ընտրությունը չվախենալով բռնությունից և ընտրակեղծիքներից: Հիշեցնենք, որ նախկին նախագահ Բեն Ալին պաշտոնանկ արվեց 2011-ի հունվարին տևական բողոքի ցույցերի արդյունքում:

Լուսանկարը` foreignpolicy.com