Թուրքիայում վերաբացվել է Մերձավոր Արևելքի ամենամեծ հայկական եկեղեցին

Մերձավոր Արևելքի երբեմնի ամենամեծ եկեղեցիներից մեկը` Սուրբ Կիրակոս եկեղեցին, որը գտնվում է Թուրքիայի Դիարբեքիր քաղաքում, վերաբացվել է հոկտեմբերի 23-ին:

Եկեղեցու վերաբացմանը մասնակցել է Պոլսո հայոց պատրիարքի փոխանորդ Արամ արքեպիսկոպոս Աթեշյանը, ԱՄՆ Արևելյան թեմի առաջնորդ Խաժակ արքեպիսկոպոս Պարսամյանը, Վաշինգտոնում ԱՄՆ Արևելյան թեմը ներկայացնող Վիգեն արքեպիսկոպոս Այքազյանը, Հալեպի հայկական եկեղեցու եպիսկոպոս Շահան Սարգսյանը և այլք, հայտնում է bnaban.am կայքը`հղում կատարելով թուրքական Doğan գործակալությանը:

Ընդհանուր առմամբ, եկեղեցու վերաբացմանը մասնակցել է 1500 հայ։

Հիշեցնենք, որ եկեղեցու վերականգնման աշխատանքները մեկնարկել էին 2009 թվականի վերջին: Վերականգնման աշխատանքների իրականացման նախաձեռնությունը պատկանում է Դիարբեքիրի Սուրբ Կիրակոս հայկական եկեղեցի հիմնադրամին:

Առաջին համաշխարհային պատերազմի տարիներին եկեղեցին զավթել էր գերմանական բանակը, իսկ 1918-ին այն վերածվել էր տեքստիլային պահեստի: 1952 թվականին հայ համայնքը դիմել էր իշխանություններին այն վերադարձնելու խնդրանքով, որից հետո եկեղեցին կրկին հանձնվել էր հայերին: Այդուհանդերձ, այն կիսաքանդ վիճակում է եղել մինչև 1980 թվականը:

Ավելի վաղ հիմնադրամի նախագահ Էրգյուն Այիկը հայտարարել էր. «Նախևառաջ, սա շատ կարևոր եկեղեցի է ճարտարապետական տեսանկյունից: Երկրորդ հերթին, այն անցյալն է խորհրդանշում: Սա քաղաքում մնացած հայկական 7 եկեղեցիներից մեկն է»: