Home / Հայաստան / Վանում բժիշկները օգնություն են խնդրում. նախարարը խնդիր չի տեսնում

Վանում բժիշկները օգնություն են խնդրում. նախարարը խնդիր չի տեսնում

Վանում գտնվող Թուրքիայի կառավարության անդամները հայտարարել են, որ իրենք կկարողանան սեփական ուժերով լուծել երեկ ավերիչ երկրաշարժի հետևանքով առաջացած խնդիրները:

Մասնավորապես, առողջապահության նախարար Ռեջեփ Աքդաղը հայտարարել է, որ երկրաշարժից տուժած երկրի արևելյան շրջանում ամեն ինչ նորմալ է, սակայն տեղի բժիշկները համաձայն չեն այս կարծիքի հետ:

Աքդաղը նշել է, որ հիվանդանոցներն ու բժշկական անձնակազմը համապատասխան վիճակում են, և կարիք չկա երկրաշարժից տուժածներից այլ շրջանների հիվանդանոցներ տեղափոխել: Այդուհանդերձ, Hürriyet Daily News-ը հայտնում է, որ իրենց հետ մասնավոր զրույցի ընթացքում բժիշկներից մեկը, ով չի ցանկացել նշել իրանունը, հայտնել է, որ քաղաքի հիվանդանոցները լուրջ վնասվել են և իրենք օգնության կարիք ունեն:

Տեղի բուժանձնակազմը խնդիրներ է ունեցել գանգուղեղային վնասվածքներով դեպքերի ժամանակ սարքավորումների և համապատասխան միջոցների բացակայության պատճառով, ասել է բժիշկը` հավելելով, որ հիվանդները պետք է տեղափոխվեն այլ քաղաքների հիվանդանոցներ պատշաճ բուժում անցնելու համար:

Պարբերականը նշում է, որ մինչ տարածաշրջանում շարունակվում են ստորգետնյա ցնցումները, քաղաքացիներին տեղավորել են հինգաստղանի հյուրանոցներում, անգամ Rescate հյուրանոցում, որտեղ կանգ են առել նախարարները:

Պարբերականը նշում է, որ երկրաշարժից տուժածները քնել են բազմոցներին, մինչդեռ նախարարները տեղավորվում էին սենյակներում:

Ֆինանսների նախարար Մեհմեդ Շիմշեկը ֆորս մաժորային իրավիճակ է հայտարարել Վանում` մեկ տարով հետաձգելով բոլոր հարկերի վճարումները:

Նշենք, որ պաշտոնական տեղեկությունների համաձայն արդեն ճանաչված 270 զոհ կա, ևս 1300-ը վիրավոր են: Դեռևս փլատակների տակ են հազարավոր մարդիկ: