Epress.am Լուրեր Հայաստանից
Իջևանի նախկին ՀՀԿ-ական քաղաքապետին ԱԺ ԲՀԿ խմբակցության պատգամավոր Նաիրա Զոհրաբյանը բարեկամական խորհուրդ է տվել չխոսել ընտրակաշառքների մասին, քանի որ դա չի բխում իր շահերից: Այս մասին Նաիրա Զոհրաբյանը հայտարարել է այսօր ԱԺ-ում: Նրա խոսքով` եթե Իջևանի նախկին քաղաքապետը շարունակի խոսել ընտրակաշառքների մասին, ապա իր մասին կասվի նաև ավելին:
Զոհրաբյանը նաև մեկնաբանել է ԱԺ ՀՀԿ խմբակցության ղեկավար Գալուստ Սահակյանի` օրերս թույլ տված արտահայտությունը, ով Իջևանի փորձը համապետական ընտրություններում կիրառելու մասին լրագրողի հարցին ի պատասխան ասել էր` «լեզուդ չորանա»:
«Ինչ վերաբերում է Գալուստ Սահակյանի հայտարարություններին, բոլոր կանխատեսումներին, մեկ բան հստակ է՝ ցանկացած ընտրության ելք որոշում է ժողովրդի տված քվեն»:
ՀՀԿ-ական պատգամավոր Արտակ Զաքարյանը, իր հերթին, խոսելով Իջևանի ընտրությունների մասին, ասել է, որ ՀՀԿ-ի երկվա գործադիր նիստում քննարկվել և վերլուծվել են հետևանքները, խնդիրները՝ դրանք հետագայում հաշվի առնելու նկատառումներով:
«Թերացումների կամ խնդիրների մասին մանրամասն տեղյակ չեմ: Բայց պետք է անել որոշակի հետևություններ՝ մարզային, տարածքային կառույցներում, գտնել այն դրդապատճառները, որոնք պատճառ են հանդիսացել ՀՀԿ-ական թեկնածուի պարտության համար: Սա ՏԻՄ համակարգին վերաբերող խնդիր է, այս խնդիրը քաղաքական ձևաչափի մեջ դիտարկել պետք չէ, և սա ուղղակի կուսակցության գործադիր մարմնի կողմից առաջարկ է տարածքային կառույցներին ուշադրության արժանացնել այս խնդիրը»,- ասել է Արտակ Զաքարյանը: