Epress.am Լուրեր Հայաստանից
Այսօր ՀՀ կառավարության շենքի մոտ բողոքի ակցիա անցկացնող հայկական բանակում զոհված զինծառայողների ծնողները կրկին բողոքում էին այն փաստի կապակցությամբ, որ, պաշտոնական վարկածի համաձայն, իրենց որդիների սպանությունները որակվում են որպես ինքնասպանություն:
Ծնողների` յուրաքանչյուր հինգշաբթի անցկացվող բողոքի ակցիաների ժամանակ հնչեցվող այս պահանջի մասին հարցը լրագրողներն ուղղել են կառավարության նիստից դուրս եկած ՀՀ պաշտպանության նախարար Սեյրան Օհանյանին:
«Օգտագործելով մեր հրամանատարական կազմի տեղեկությունները, հասարակության բոլոր խավերի աջակցությունը մեզ, հ/կ-ների առաջարկությունները… բանակի հրամանատարությունն այսօր այն կառույցն է, որն ամենալավն է տիրապետում, թե բանակում ինչ է կատարվում և ինչպես պայքարել դրանց դեմ: Այդ որակումները իրենց մեջ պարունակում են իրավական փաստեր և ցանկացած որակում նախնական հետազոտման, նախնական տվյալների արդյունք է, որը քրեական գործի ընթացքում կարող է այս կամ այն կերպ, այս կամ այն ուղղությամբ փոխվել», – ասել է Օհանյանը:
Այս առնչությամբ նա կարծիք է հայտնել, որ այսօր ՀՀ զինվորական դատախազը Գևորգ Կոստանյանը նորմալ է աշխատում, և նա ամենից շատ է շահագրգռված, որ ՀՀ ՊՆ-ն լիարժեք տեղեկություններ ստանա:
«Մենք համատեղ աշխատում ենք, որովհետև նման գործերի ճիշտ բացահայտումը օգնելու է կարգապահության ամրապնդմանը»,- ասել է նախարարը:
Նշենք նաև, որ հեռանալիս Սեյրան Օհանյանը զրուցել է 2010 թվականի հուլիսին բանակում սպանված Արտակ Նազարյանի մոր՝ Հասմիկ Հովհաննիսյանի հետ, և հավաքվածների առջև խոստացել է, որ մի քանի օրվա ընթացքում կընդունի նրան: