Գործարար Ավագյանցին մահացած են գտել Մոսկվայի բնակարանի մուտքում

«Ռուսաստանի երկաթգծեր» ընկերության մաս կազմող «Սպեցմոստոտրեստ» ձեռնարկության ղեկավարի տեղակալ 50-ամյա Պյոտր Ավագյանցին մահացած են գտել Մոսկվայում գտնվող իր բնակարանի մուտքում, հայտնում է Life News-ը: Ենթադրաբար, տղամարդը ինքնասպան է եղել, սակայն դրդապաճառները հայտնի չեն:

Պարբերականի տեղեկություններով` Ավագյանցը ինքնասպան է եղել որսորդական հրացանով իր բնակարանի աստիճանահարթակի վրա:

Ավագյանցի մարմինն առաջինը հայտնաբերել է կինը: Տեսնելով արյունաթաթախ ամուսնուն` կինը շտապօգնություն է կանչել: Սակայն տեղ ժամանած բժիշկներին մնում էր միայն մահն արձանագրել:

Կինը կարծում է, որ ամուսինն ինքնասպան է եղել աշխատանքային անհաջողություններով պայմանավորված  ընկճախտի պատճառով: «Նա ասում էր, որ չի կարող այդպես ապրել: Եվ որ ամեն ինչ զզվեցրել է: Ասում էր, որ ցանկանում է սպանել ինքն  իրեն: Բայց չէի կարծում, որ նա դա իսկապես կանի»,- կնոջ խոսքերն է փոխանցում պարբերականը: