Ամենամեծ թվով բանտարկված լրագրողները Իրանում են

Լրագրողների պաշտպանության կոմիտեն (Committee to Protect Journalists) իր հերթական զեկույցում հայտնել է, որ ներկայումս աշխարհում 179 լրագրողներ իրենց մասնագիտական գործունեության հետ կապված տարբեր պատճառներով բանտում են: Զեկույցի տեքստը հրապարակվել է Կոմիտեի կայքում: Անազատության մեջ պահվող լրագրողների թվով առաջին տեղում է Իրանը: 2009 թվականի նախագահական ընտրությունների արդյունքները վիճարկել փորձող ԶԼՄ-ների ճնշման արշավի շրջանակներում իրանական իշխանությունները 42 լրագրողի են ձերբակալել:

Առաջին տասնյակում են հայտնվել նաև Էրիթրեան (28 լրագրող), Չինաստանը (27 լրագրող), Մյանման (12 լրագրող), Վիեթնամը (9 լրագրող), Թուրքիան ու Սիրիան (8-ական լրագրող), ինչպես նաև Իսրայելն ու Պաղեստինը (7 լրագրող):

Անազատության մեջ գտնվող լրագրողների, խմբագրերի և ֆոտոլրագրողների թիվը նախորդ տարվանից աճել է 34-ով: Լրագրողների պաշտպանության Կոմիտեն այս աճը բացատրում է Մերձավոր Արևելքում և Հյուսիսային Աֆրիկայում տեղի ունեցած խռովություններով: Վերջին անգամ նման բարձր ցուցանիշ գրանցվել է 1996 թվականին: Այդ տարի Կոմիտեի տվյալների համաձայն 185 լրագրող բանտում էր գտնվում: