Home / Հայաստան / Արմեն Օհանյանին ԱԱԾ էին հրավիրել իր հետ կապ չունեցող գործի համար

Արմեն Օհանյանին ԱԱԾ էին հրավիրել իր հետ կապ չունեցող գործի համար

Արձակագիր, ակտիվիստ, «Բանակն իրականում» հասարակական նախաձեռնության անդամ Արմեն Օհանյանը երեկ բերման ենթարկվելուց և ժամեր անց ազատվելուց հետո, նույն օրը ժամը 16.00-ին հրավիրվել է  ԱԱԾ քննչական վարչություն` հարցաքննության: Epress.am-ի հետ զրույցում Արմեն Օհանյանն ասել է, որ իրեն որպես վկա են կանչել հարցաքննության իր հետ բոլորովին կապ չունեցող գործի համար:

«Ինչ-որ մարդկանց անուններ տվեցին, որոնց ես չեմ ճանաչում, միայն իմ ընկերներից մեկի մասին, ում անունը կա այս գործում, հարցրեցին, թե որտեղից եմ ճանաչում և այլն: Բայց ես ավելի շատ զայրացած եմ առավոտվա պատմությունից, որ առավոտյան ժամը յոթին կարող են գրավել  մարդու տունը ու առանց ծանուցագրի նրան բերման ենթարկել: Եթե նրանք ծանուցագիր ներկայացնեին և ես հասկանայի` ինչ կարգավիճակով եմ հրավիրվում հարցաքննության, կկանչեի իմ փաստաբանին ու դեմ չէի լինի գնալ նրանց հետ»,- ասել է Արմեն Օհանյանը:

Այդ մասին Օհանյանը բարձրաձայնել է նաև հարցաքննության ժամանակ և ստացել պատասխան, որ այդ գործի օպերատիվությունից և կարևորությունից ելնելով` առվոտյան  հավաքել են բոլոր հնարավոր  մարդկանց, որոնք կարող են կապ ունենալ գործի հետ:  Օհանյանին նաև ասել են, որ բերման ենթարկողները ԱԱԾ-ից չեն եղել, այլ ոստիկանությունից, ում ԱԱԾ-ն փոխանցել է այն մարդկանց անունները, որոնք պետք է  կանչվեն հարցաքննության, իսկ ոստիկանությունն էլ, Օհանյանի խոսքով, իրեն հատուկ մեթոդով՝ կոպտությամբ, դա իրականացրել  է:

Լուսանկարը` Արմեն Օհանյանի Facebook-ի էջից