Սերժ Սարգսյանն ու Իլհամ Ալիևը քաշքշել են միմյանց Մոսկվայում, պնդում է օրաթերթը

Դեկտեմբերի 19-ին մոսկովյան Կրեմլի Մեծ պալատում ԱՊՀ-ի 20-ամյակի կապակցությամբ ՌԴ նախագահ Դմիտրի Մեդվեդևի հրավիրած ընդունելության ժամանակ խայտառակ միջադեպ է տեղի ունեցել. Սերժ Սարգսյանն ու Իլհամ Ալիևը քաշքշել են իրար: Այս մասին իր այսօրվա համարում գրում է «Հայկական ժամանակ» օրաթերթը` հղում կատարելով իր մոսկովյան լավատեղյակ աղբյուրներին:

Ներկայացնելով դեպքի մանրամասները` օրաթերթը նշում է, որ նախատեսված է եղել ԱՊՀ 20-ամյակի կապակցությամբ շքանշանների հանձնում՝ ԱՊՀ անդամ յուրաքանչյուր պետությունից մեկ դիվանագետի։ Ընդ որում, շքանշանի հանձնման համար հարկավոր է եղել ԱՊՀ անդամ պետությունների ղեկավարների միաձայն որոշումը։ Բոլոր պետությունների ներկայացուցիչներն ստացել են պարգևները, իսկ երբ հերթը հասել է Հայաստանի ներկայացուցչին (Հայաստանի ղեկավարությունն այդ պարգևին ներկայացրել էր փոխարտգործնախարար Շավարշ Քոչարյանին), Իլհամ Ալիևն առարկել է, ու Քոչարյանը մեդալ չի ստացել: Ադրբեջանի ներկայացուցչին շքանշանի շնորհման քվեարկությունը դրանից մի քանի րոպե առաջ է եղել, և Սերժ Սարգսյանը չի առարկել։

«Այնուհետև սեղանի շուրջ Իլհամ Ալիևը Սերժ Սարգսյանին սկսել է հանդիմանել, թե այդ ո՞ւմ ես ներկայացնում շքանշանի ու անհարգալից արտահայտությունների տարափ է տեղացել Շավարշ Քոչարյանի հասցեին՝ ակնարկելով, որ Ադրբեջանի ղեկավարության հասցեին Շավարշի հնչեցրած հրապարակային քննադատությունները չեն նպաստում ԼՂ խնդրի խաղաղ կարգավորմանը։ Սերժ Սարգսյանն էլ տակ չի մնացել ու սկսել է Իլհամին պատասխանել նույն ոճով, թե՝ այդ քո աշխատակազմի ղեկավարն ու ձեր դիվանագետներն են, որ ավել-պակաս հայտարարություններով խաթարում են պրոցեսը։ Բանն այնտեղ է հասել, որ Աերժն ու Իլհամը ոտքի են կանգնել, սկսել են միմյանց հրել ու մենամարտի պատրաստ մարտական կեցվածք են ընդունել։ Միայն Մեդվեդևի՝ «նու գասպադա, չտո վի» արտահայտությունից հետո են նրանք նստել իրենց հատկացված տեղերում, որից հետո էլ Իլհամ Ալիևն ատամները կրճտացնելով՝ Սերժ Սարգսյանին սպառնացել է, թե դեռ կտեսնեք՝ ձեզ հետ ինչ ենք անելու», – միջադեպի մանրամասները ներկայացրել է «Հայկական ժամանակը»։

Թերթը նշում է, որ այս ամենի կապակցությամբ իր թղթակցին չի հաջողվել մեկնաբանություն ստանալ Սերժ Սարգսյանի մամլո քարտուղար Արմեն Արզումանյանից:

«ՀՀ ԱԳ նախարարության խոսնակ Տիգրան Բալայանը Շավարշ Քոչարյանի մեդալ չստանալու հանգամանքի վերաբերյալ մեր հարցին ոչինչ չասող պատասխան տվեց՝ ըստ էության ոչ հերքելով, ոչ հաստատելով մեր ունեցած տեղեկությունը։ Մոսկովյան մեր աղբյուրները հաստատում են, որ նման միջադեպ իսկապես տեղի է ունեցել», – եզրափակում է օրաթերթը։