Խաբված բնակարանատերերը նախագահականի մոտ պատրաստ են հացադուլի նստել

Երեկ ՀՀ նախագահի նստավայրի մոտ բողոքի ակցիա կազմակերպած Արամի, Եկմալյան, Բուզանդ, Սարյան փողոցների մի քանի նորակառույց շենքերի բնակարանների բնակիչներն այսօր նախագահականի դիմացի մայթին` Մարշալ Բաղրամյան մետրոյի դիմաց հավաքվել են նստացույցի: Այս պահին նրանք քննարկում են նաև հացադուլ սկսելու հարցը:

2006 թվականին բնակիչները դուրս են եկել իրենց տներից, որոնք հետագայում քանդել են, և դրանց փոխարեն կառուցվել են նոր բազմաբնակարային շենքեր: 2006 թվականին «Գապբնակշին» ՍՊԸ տնօրեն Գագիկ Պապոյանը պայմանագիր է կնքել իրենց հետ շենքը պատրաստ լինելուց հետո բնակարանով ապահովելու պայմանով, սակայն բնակարանները մինչ օրս չեն ստացել, դրանք վերավաճառվել են երրորդ անձանց:

Հավաքվածների խոսքով` իրենք այլևս ոչ մեկին չեն հավատում և նախագահականի մոտից չեն հեռանալու` մինչև նախագահն անձամբ հարցը չլուծի:

«Դատական համակարգին չենք հավատում, սրանց մեջքին շատ ուժեղ պարագլուխներ են կանգնած: Պահանջում ենք միմիայն հանդիպում Սերժ Սարգսյանի հետ, այլապես այստեղից չենք գնալու: Թող նախագահն անձամբ լուծի այս խնդիրը: Պետք լինի` հացադուլի էլ կնստեմ: Էդ չեմ արել, էդ էլ կանեմ», – Epress.am-ի հետ զրույցում ասել է ակցիայի մասնակից Սոնա Մաղաքյանը:

Ակցիայի մեկնարկից որոշ ժամանակ անց նախագահի անձնակազմի աշխատակիցներից մեկը, ով հրաժարվեց ներկայանալ, ներս հրավիրեց մի քանի հոգու: Նրանց հետևած Գոհար Թաթալյանը հանդիպել է Նամակների բաժնի ղեկավար Աիդա Ասատրյանի հետ: Հանդիպման ժամանակ նա Ասատրյանին ասել է, որ 2007 թվականին այն ժամանակ ՀՀ նախագահի թեկնածու Սերժ Սարգսյանը խոստացել էր լինել ժողովրդի կողքին, և այդ պատճառով ինքն ընտրել է Սարգսյանին: Այժմ էլ պահանջում է, որ իր ձայնը լսելի լինի: Ասատրյանը հավաստիացրել է, որ Սերժ Սարգսյանը տեղյակ է խնդրից, և նախագահականում դրանով զբաղվում են, և հարցին լուծում կտրվի:

Հավաքվածները, սակայն, պնդում են, որ փոխզիջման չեն գնա, և շարունակելու են նստացույցն այնքան ժամանակ մինչև Սերժ Սարգսյանն անձամբ չհանդիպի իրենց հետ, կամ խնդրին շուտափույթ լուծում չտրվի:

Այս պահին տարածք են ժամանել մեծ թվով ոստիկանական մեքենաներ:

Նշենք, որ ակցիային միացել է նաև ֆրանսահայ գործարար Արմենուհի Հարությունյանը, ով նույնպես տուժել է Հայաստանում բնակարանային խնդրից: