«Ասում էի, չէ՞, որ կանեմ». Օբաման երգեց Հարլեմում (ՏԵՍԱՆՅՈՒԹԵՐ)

ԱՄՆ նախագահ Բարաք Օբաման Հարլեմի հայտնի Ապոլո թատրոնում տեղի ունեցած դրամական միջոցների հավաքագրման միջոցառման ժամանակ ամերիկյան հայտնի երաժիշտ Ալ Գրինի «Արի միասին մնանք» երգից մի հատված է երգել:

Բեմ բարձրանալուն պես նախագահը շնորհակալություն է հայտնել իր հյուրերին և իրեն նախորդող կատարողներին, այդ թվում` «կենդանի լեգենդ» Ալ Գրինին, և կատարել նրա երգից մի փոքր հատված:

«Ես…Ես այնքան սիրահարված եմ քեզ»,- երգում է նախագահը:

Օբաման այնուհետև ցույց է տալիս վարագույրների կողմը և բացատրում. «տղաները չէին կարծում, որ ես դա կանեմ: Ասում էի չէ՞, որ կանեմ»: Դիմելով դահլիճում նստած Գրինին, Օբաման ասում է. «Մի անհանգստացի Ռև, Ես քո պես չեմ երգում, պարզապես ուզում էի ցույց տալ` որքան եմ քեզ գնահատում»:

Ավելի վաղ Youtube-ում տեսանյութ էր տարածվել, որտեղ Բարաք Օբաման, դեռևս Սենատոր եղած տարիներին, հյուրընկալվելով հեռուստատեսային հաղորդմանը, սկսում է պարել հաղորդավարի հետ Բիյոնսեի «Crazy in Love» երգի ներքո: