Հողերը կորցրած քաղաքացիները Նախագահականի մոտ համարժեք հատուցում էին պահանջում (ՏԵՍԱՆՅՈՒԹ)

Այսօր նախագահական նստավայրի մոտ բողոքի ակցիա էին անցկացնում Դալմայի այգիների հողերի նախկին սեփականատերերը, ովքեր պնդում են, որ իրենց հողերը խլել են և համարժեք փոխհատուցում չեն տվել:

«Ինը տարի է` գալիս ենք, ու ապարդյուն: Խորհրդային միության փլուզումից հետո մեզ օրենքով բաժին հասած հողերն առանց մեր գիտության վաճառել են: Մեր այգում ամուսիններով նստած հողի գնորդն եկել ու ասել է, որ այս տարածքն իրենն է: Մենք ապշահար եղած հարցրինք՝ ո՞նց թե ձեր հողն է, թուղթ ունե՞ք, ասացին` կբերենք:

Հետո պարզվում է, որ Հովիկ Աբրահամյանի քույրը, քաղաքապետարանի աշխատողներ, դատավորներ, դատախազներ, պատգամավորներ մեջ-մեջ են արել Դալմայի այգիները, բաժանել են, լավ թիքյա ա, Ռոբերտ Քոչարյանը բոլորին շաբաշ է տվել, ու մենք կանգնել ենք փաստի առաջ: Հողի գնորդին հարցնում ենք` ումի՞ց եք առել, ասում են՝ քաղաքապետարանից՝ մի փեշ փող ենք տվել քաղաքապետարանին ու առել ենք: Երբ հարցնում ենք՝ մեզ պատասխան չունե՞ք տալու, ասում են՝ թող քաղաքապետարանը պատասխան տա: Իններորդ տարին է քաղաքապետարանը պատասխան չի տալիս», – Epress.am-ի հետ զրույցում պատմել է ակցիայի մասնակից Ջեմմա Կիրակոսյանը :

Մեկ այլ մասնակից Ջուլիետտա Արշակյանի խոսքով՝ ժամանակին Ռոբերտ Քոչարյանն ասել է, թե «անգամ մայթերին լոբի ցանած մարդիկ էլ փոխհատուցում են ստանալու», ո՞ւր է այս խոստման տերը:

Դալմայի այգիների սեփականատերերի հավաստմամբ՝ այսօր ՀՀ կառավարությունն անում է հնարավոր ամեն բան հարցի լուծումը երկարաձգելու  համար:

«Մեզ այնքան են խաբելու, մինչև 1800 հոգանոց մեր շարքերը կնոսրանան ու այլևս իրենց պահանջ ներկայացնող չի մնա: Հայրս ուղիղ մեկ տարի  հողի հարկ է մուծել այն բանից հետո, երբ այդ հողն արդեն մեզանից խլել էին: Երբևէ գլխացավ չունեցած հայրս մահացավ հայտնված հողատիրոջ հետ հերթական վիճաբանության ժամանակ ու այսքանից հետո հողատերն առանց ամաչելու ասաց՝ 100 դոլար կտամ հոգեհացի համար: Հորս մշակած այգու 400-500 ծառերն այսօր գողացել, կտրել ու վաճառել են», – ասել է ակցիայի մասնակից Զոյա Գաբրիելյանը:

Բողոքողների խոսքերով՝ այսօր արդեն անհնար է իրենց վերադարձնել այդ հողերը, քանի որ այդ տարածքում արդեն դղյակներ ու պալատներ են վեր խոյանում: Նրանք պահանջում են փոխհատուցել իրենց հողատարածքների գումարները:

«Կադաստրային արժեք գոյություն ունի, թող հաշվեն ու 1քմ-ի դիմաց վճարեն մեզ հասանելի գումարները: 7700 քմ-ի դիմաց երեք սեփականատերերիս առաջարկում են 2000 դոլար: Ուղղակի ծիծաղելի է, անգամ Ղռերում հողն այս արժեքը չունի», – ասել է բողոքողներից Արմեն  Գալստյանը:

Խաբված հողատերերը նշել են, որ իրենք ոչ մեկի չեն հավատում՝ ոչ նախագահին, ոչ վարչապետին, ոչ էլ՝ «անարդարադատության նախարարին»:

«Երկու զինվոր  որդի ունեմ, երկուսն էլ սահման են պաշտպանում, երրորդին էլ շուտով տանելու են ծառայության, իմ երկիրն ինձ ինչո՞վ է պաշտպանում, ոչ տուն ունեմ, ոչ՝ եկամուտ, այսօր էլ  եկել ողորմություն եմ խնդրում: Թող ետ բերեն տղաներիս, ինչիս է պետք այս երկրի սահմանները պաշտպանելը»,- բողոքել է Զոյա Գաբրիելյանը:

ՀՀ նախագահի նստավայրի դիմացի մայթին կանգնած մարդկանց ակցիայի ընթացքում մոտեցել է միայն Երևանի քաղաքապետարանի ներկայացուցիչ Դավիթ Ազիզյանը, ով նշել է, որ իրենք աշխատում են այդ հարցի լուծման ուղղությամբ, իսկ մշտական բողոքի ակցիաներով մարդիկ խանգարում են իրենց աշխատանքին: Նա խոստացել է, որ բոլոր մարդիկ փոխհատուցում կստանան:

Մարդիկ պահանջ են ներկայացրել, որպեսզի 1 քմ-ի դիմաց իրենց նորմալ գումար վճարեն: Քաղաքապետարանի ներկայացուցիչը կրկին ասել է, որ խնդրի լուծումն ընթացքում է:

Ակցիան շարունակվել է մոտ 1,5 ժամ, որից հետո բողոքողները ցրվելեն, սակայն նրանք պատրաստվում են վաղը հավաքվել ՀՀ կառավարության մոտ: