Home / Հայաստան / Միքայելյանը խոստանում է Հրազդանի գործող քաղաքապետին էլէկտրիկ դասավորել (ՖՈՏՈՇԱՐՔ)

Միքայելյանը խոստանում է Հրազդանի գործող քաղաքապետին էլէկտրիկ դասավորել (ՖՈՏՈՇԱՐՔ)

Հայ Ազգային Կոնգրեսի ներկայացուցիչ, Հրազդանի քաղաքապետի թեկնածու Սասուն Միքայելյանն այսօր իր նախընտրական  հանրահավաքի ժամանակ խոստացել է, որ քաղաքապետ ընտրվելուց հետո աշխատանքից չի ազատի այն պետական պաշտոնյաներին, որոնք ծառայել են ժողովրդին և կոռուպցիոն գործընթացներում ներգրավված չեն եղել:

Հրազդանում կայացած հանրահավաքին, բացի Սասուն Միքայելյանից, ելույթ են ունեցել նրա նախընտրական շտաբի պետ Հակոբ Ավագումյանը, Հայ Ազգային Կոնգրեսի ներկայացուցիչներ Արամ Սարգսյանը, Նիկոլ Փաշինյանը, Վահան Վարդապետյանը, Մեսրոպ Մեսրոպյանը:

Ինչպես Epress.am-ի հետ զրույցում տեղեկացրել է Կոնգրեսի արտաքին հանձնախմբի ներկայացուցիչ Վլադիմիր Կարապետյանը, ով նույնպես եղել է Հրազդանում, հանրահավաքը բավական բազմամարդ էր:

Միքայելյանը  հանրահավաքի մասնակիցներին պատմել է, որ Հրազդանի ՋԷԿ-ի ղեկավարը գործող քաղաքապետ, ՀՀԿ-ական Արամ Դանիելյանի նախընտրական տեսեհոլովակում հայտարարել է, որ վերջինս պրոֆեսիոնալ է իր գործում, բացի դա, լավ էլեկտրիկ է:  Սասուն Միքայելյանն այս առնչությամբ կատակել է, որ հենց երկուշաբթի` ընտրությունների հաջորդ օրը,  Արամ Դանիելյանին կուղարկի ՋԷԿ, որպեսզի ՋԷԿ-ի ղեկավարը նրան գործի տեղավորի որպես էլէկտրիկ:

Վաղը նախընտրական համերգ է կազմակերպելու նաև Արամ Դանիելյանը: Միքայելյանի խոսքով` դա կլինի գործող քաղաքապետի «վերջին զանգը», որից հետո ինքը Դանիելյանին «հանդիսավոր կերպով կճանապարհի»:

Նշենք նաև, որ վաղը սահմանված կարգով  նախընտրական քարոզարշավի վերջին օրն է, որից հետո թեկնածուներն իրավունք չունեն քարոզչություն իրականացնել:

Լուսանկարները տրամադրել է Հելսինկյան ասոցիացիան