ԲՀԿ-ականը երեկվա միջադեպը որակել է շոու, ՀՀԿ-ականը խորհուրդ է տվել «չխորանալ»

«Բարգավաճ Հայաստան» կուսակցության կողմից ԱԺ այս տարվա առաջին քառօրյայի առաջին նիստը բոյկոտելը ԲՀԿ անդամ Սամվել Բալասանյանը նորմալ է համարում:

«Մի կարևոր օրինագիծ չքվեարկեցինք («Կանխիկ գործառնությունների սահմանափակման» – խմբ.), որոշումը չընդունվեց: Մենք քննարկեցինք մեր խմբակցությունում և եկանք այն եզրակացության, որ այս նախագիծը անհրաժեշտ է, որ օրենք դառնա,  բայց ժամանակավրեպ է, և մենք չքվեարկեցինք»,- այսօր ճեպազրույցում ասել է Բալասանյանը:

Անդրադառնալով ԱԺ-ում երեկ տեղի ունեցած քվեարկությանը, երբ  պատգամավորները քվեարկում էին մեկը մյուսի փոխարեն, Սամվել Բալասանյանն անկեղծացել է` ասելով, որ, փաստորեն, քարտային համակարգն էլ իրեն չի արդարացնում:

Երեկվա տեղի ունեցածը նա որակել է շոու, որն անիմաստ էր սարքելը:

Միևնույն ժամանակ, Բալասանյանը փորձել է  արդարացնել իր գործընկերների վարրքագիծը` նշելով որ ինքը ԱԺ-ում աշխատելու 13 տարվա փորձ ունի և գիտի, որ այս նախընտրական ժամանակահատվածում պատգամավորների բացակայություններ հնարավոր են, քանի որ շատերը զբաղված են մեծամասնականի հետ կապված հարցերով, շատերը գործուղումների մեջ են:

ԱԺ ՀՀԿ խմբակցության ղեկավար Գալուստ Սահակյանը երեկվա միջադեպը հետևյալ կերպ է մեկնաբանել.

«Ինչքան ընտրություններին մոտենում ենք, այնքան դանակավորները շատանում են, մամուլն էլ ոգևորվում է»:

Նա բացառել է, որ իր գործընկերները քվերակում են մեկը մյուսի փոխարեն, մինչդեռ այդ փաստն արձանագրել են ոչ միայն ԱԺ աշխատանքները լուսաբանող լրագրողներն ու օպերատորները, այլ հենց ԱԺ-ի տեսախցիկները:

Այս հարցի առնչույթամբ Սահակյանն ասել է,  որ այդ ամեն ինչը ոչ կարող է ժխտել, ոչ էլ հաստատել:

«Որովհետև ես հետաքննությամբ չեմ զբաղվում, ինչպես կարող են լրագրողները  զբաղվել, պարզապես խորհուրդ կտայի լրագրողներին,  որ պետք չէ խորանալ նման տիպի հարցերի մեջ: Պարզից էլ պարզ է, որ այն օրինագծերը, որոնք ընթացս քվեարկության են դրվում,  ամենամեծ ձայներով են անցնում»,- ասել է  Սահակյանը: