Թուրքիայում դատարանները անկախ չեն. Զարաքոլուի փաստաբանները դիմում են եվրադատարան

«Քրդական համայնքների միություն» (KCK) կազմակերպության հետ համագործակցելու մեջ մեղադրվող կալանավորված թուրք գրող, հրապարակախոս, «Բելգե» հրատարակչատան տնօրեն, իրավապաշտպան Ռաղըփ Զարաքոլուի փաստաբանները հայց են ներկայացրել Մարդու իրավունքների եվրոպական դատարան: Նրանք պահանջում են վերանայել համար դատախազի մեղադրանքները, որոնք հանգեցրել են 2011 թվականի նոյեմբերի 1-ին Զաքարոլուի ձերբակալությանը:

Թուրքիայի իշխանությունները նշում են, որ KCK-ը ահաբեկչական համարվող Քրդական բանվորական կուսակցության մաս է կազմում:

«Սա իշխող «Արդարություն և զարգացում» կուսակցության կողմից բացված, քաղաքական դրդապատճառներ ունեցող գործ է, և դատախազի, ինչպես նաև դատավորի անկախության և անկողմնակալության բացակայությունը բարդացնում է արդար և օրինական վճռի կայացումը», – ասել է Զարաքոլուի փաստաբան Օզքան Քիլիչը:

Փաստաբանները Եվրոպական դատարանում վիճարկելու են ձերբակալության հիմքերը և կալանավայրում մեղադրյալի նկատմամբ վերաբերմունքը:

Նշենք, որ Զաքարոլուի հետ նույն գործով դատարանի առջև կկանգնեն 180 կասկածյալներ: