Նազարյանի գործով հարցերը բարձր օղակներում են որոշվում. Սեյրան Օհանյանը խոստացավ կրկին միջամտել

Դատավորի ուզածն էր, որ տուժող կողմը չմասնակցի դատերին, քանի որ  մասնակցությունը դժվարացնում էր իրենց համար ծածկադմբոց անել գործը. հիմա դատական նիստերը Իջևան են տեղափոխել հենց այդ պատճառով:

Այսօր կառավարության շենքի մոտ բողոքի ակցիայի ժամանակ Epress.am-ի հետ զրույցում այս մասին ասել է 2010 թվականի հուլիսի 27-ին Տավուշի մարզի «Մեհրաբ» զորամասում զոհված լեյտենանտ Արտակ Նազարյանի քույրը`  Ծովինար Նազարյանը:

Հիշեցնենք, որ փետրվարի 14-ին Իջևանում կայացած նիստի ժամանակ դատավորի տուժող կողմը լքել է դատական դահլիճն այն բանից հետո, երբ դատավոր Սամվել Մարդանյանը որոշել է հիմք ընդունել գործով անցնող առանցքային վկա Արման Մնացականյանի նախաքննական ցուցմունքը` պարտադիր չհամարելով նրա ներկայությունը դատարանում:

«Եթե հիշում եք Պաշտպանության նախարարի խոսնակը (Դավիթ Կարապետյան – խմբ.) հայտարարել էր, թե նախարար Սեյրան Օհանյանի միջամտությամբ էր, որ գործը բերվեց Երևան: Էդ ժամանակ իրականում ներկայացվել էին բազմաթիվ միջնորդություններ գործը Երևան բերելու, որոնցից մեկն էլ քննության առնելով` դատավորը որոշեց  բավարարել այն: Դա  մեր կողմի ներկայացրած միջնորդությունն էր, որին համաձայնեցին  բոլոր պաշտպանները, ինչպես նաև մեղադրող դատախազը: Իմիջիայլոց, դատախազը հիմա էլ մասնավոր զրույցերում ասում է, որ իրեն հարմար չի Իջևանում նիստերին մասնակցել: Այդ հայտարարությունից հետո մի եզրակացության կարելի է գալ` հիմա գործը Իջևան է տեղափոխվել դարձյալ Սեյրան Օհանյանի հրամանով: Ես նույնիսկ կասկածներ ունեմ, որ շատ ավելի բարձր հրամաններով: Մանավանդ երբ մի փաստ շատ ակնառու է: Ո՞նց են Արտակ Նազարյանի, Տիգրան Առաքելյանի և Մարգար Օհանյանի դատավարություները  նշանակվում միշտ նույն օրերին… որպեսզի լուրերի թողարկումները վերածվեն 02-ի խրոնիկայի և հասարակությանը չհասնի սոցիալական լրջության որևէ ուղերձ: Ակնհայտ է, որ դատավարությունների ժամկետից սկսած, վայրից սկսած, որոշվում են ինչ-որ շատ բարձ օղակներում», – ասել է Ծովինար Նազարյանը:

Կառավարության նիստի ավարտից հետո շենքից դուրս եկած ՀՀ Պաշտպանության նախարար Սեյրան Օհանյանին մոտեցել է Արտակ Նազարյանի մայրը` Հասմիկ Հովհաննիսյանը: Նրան հետևել են լրագրողները:

Տեսնելով լրագրողներին` Սեյրան Օհանյանը, ով մինչ այդ կանգնած էր, տեղից շարժվել է` դիմելով հավաքվածներին, այդ թվում նաև լրագրողներին.

«Հիմա ամբողջ ճանապարհով սենց ինձ հետևելո՞ւ եք: Եկեք ոտքով գնանք պաշտպանության նախարարություն իրար հետ: Գնա՞նք, գնա՞նք ՊՆ-ը միասին: Ոտքով եկեք գնանք»:

Դրանից հետո Հասմիկ Հովհաննիսյանը դիմել է նախարարին իր որդու գործով նիստը դարձյալ Երևան տեղափոխելու խնդրանքով: Նախարարը նշել է, որ ինքը կողմերի համար ստեղծել է բոլոր պայմանները Իջևան գնալու համար:

Հովհաննիսյանն ասել է, որ այդ առումով ինքն առարկություն չունի, և դրա համար շնորհակալություն հայտնել է, սակայն, նրա խոսքով, «դատը Երևան բերել է պետք»:

Նախարարը խոստացել է, որ «կրկին կփորձի ինչ-որ բան անել»:

Օհանյանը շարունակել է զրույցը բանակում զոհված զինծառայողների ծնողներից մի քանիսի հետ, իսկ քիչ հեռու Epress.am-ի թղթակիցը նկատել է, որ մի տղամարդ և երկու կին սկսել են վիճել բողոքող մյուս ծնողների հետ:

Տղամարդն ու կանայք հորդորել են Սեյրան Օհանյանին չմեղադրել` նշելով, որ նա բազմաթիվ բարի գործեր է կատարել: Սա զայրացրել է ծնողներից ոմանց: Զոհված զինծառայող Վալերի Մուրադյանի մայրն  ի պատասխան բղավել է.  «Ո՞վ ա ասում վատ մարդ ա, ամեն մարդ իրա համար շատ լավ մարդ ա, մեզ ինչ»:

Լեզվակռիվը շարունակվել է, և կողմերը հանդարտվել են միայն այն բանից հետո, երբ կառավարության շենքի մոտ կանգնած մարդիկ և ոստիկանները միջամտել են: