Ամերիկացիներն անվանել են իրենց գլխավոր թշնամիներին

Գելափ կազմակերպության կողմից անցկացված հասարակական կարծիքի համազգային հարցումները ցույց են տվել, որ ամերիկացիները որպես իրենց «ոխերիմ թշնամի» են տեսնում Իրանին:

Չորեքշաբթի հրապարակված տվյալների համաձայն, հարցման մասնակիցների 32%-ը Իրանին «համար 1» թշնամի է համարում: Նախորդ տարի նույն կարծիքին էին ամերիկացիների 25%-ը:Մասնագետների կարծիքով` բացասական վերաբերմունքի աճը պայմանավորված է Թեհրանի միջուկային նկրտումների վերաբերյալ ԱՄՆ-ի բնակիչների շրջանում առաջացող տագնապի զգացումով:

ԱՄՆ-ի թշնամիների առաջին հնգյակում են Չինաստանը (23%), Հյուսիսային Կորեան (10%), Աֆղանստանը (7%) և Իրաքը (5%): 6-րդ հորիզոնականը կիսել են Ռուսաստանն ու Պակիստանը (2%):

Հարցվածների 1%-ը վստահ է, որ «ԱՄՆ-ն հենց ինքն իր գլխավոր թշնամին է»:

Իսկ նախորդ շաբաթ անցկացված հարցումները, որոնք նպատակ ունեին պարզելու, թե հատկապես ո՞ր երկրների նկատմամբ ամերիկացիները բարյացակամ վերաբերմունք ունեն, պարզել են, որ այդպիսի երկրների թվում են կանադացիները (96%), ավստրալացիները (93%), բրիտանացիները (90%), գերմանացիները (86%) և ճապոնացիները (83%):