Եթե անգամ բանակը ֆրակներով և թիթեռնիկներով գա… Ինչու չպետք է ընդունել արտակարգ դրության մասին օրինագիծը

Այսօր ՀՀ Ազգային Ժողովում դարձյալ քննարկվել է «Արտակարգ դրության իրավական ռեժիմի մասին» օրենքի նախագիծը: Վաղը` մարտի մեկին, նախագիծը կդրվի քվեարկության:

ԱԺ «Ժառանգություն» և ՀՅԴ խմբակցությունները, սակայն, շարունակում են դեմ արտահայտվել նախագծին և ցանկանում են, որպեսզի այն կրկին փոփոխությունների ենթարկվի: Մասնավորապես, այս խմբակցությունների պատգամավորներին անհանգստացնում է այն, որ նախագծում նշված է, որ արտակարգ դրության ժամանակ ներգրավվելու են Զինված ուժերը:

«Ժառանգության» պատգամավոր Արմեն Մարտիրոսյանի խոսքով` եթե անգամ բանակը գեղեցիկ ֆրակներով` թիթեռնիկներ կպցրած, գա, միևնույնն է, դա  անթույլատրելի է: Վերջինս նշել է, որ այս օրենքն ինքին խախտում է սահմանադրական կարգը:

«Իսկ ով ասեց, որ Սահմանադրական կարգի խախտումը միայն իշխանությունը վերցնելն է: Չէ՞ որ սահմանադրական կարգը  շատ այլ նորմեր է ենթադրում, որոնցից մեկը հավաքների ազատությունն է, կյանքի իրավունքն է»,- ասել է Արմեն Մարտիրոսյանը:

Պատգամավորի խոսքով` ոչ ոք իրավունք չունի սահմանափակել զանգվածային խաղաղ բողոքները:

«Եթե կան սադրիչներ, ապա ԱԱԾ-ի և ոստիկանության ներկայացուցիչները պետք է անմիջապես չեզոքացնեն այդ սադրիչներին և հեռացնեն խաղաղ ցույցի վայրից: Ոչ թե դրա անվան օգտագործման տակ հայտարարվի արտակարգ դրություն, և մի հատ էլ զորքը բերվի, ինչին ականատես եղանք 2008 թվականի մարտի մեկին»,- ասել է Արմեն Մարտիրոսյանը:

ՀՅԴ խմբակցության պատգամավոր Արծվիկ Մինասյանը կարծիք է հայտնել, որ «սա ոչ թե իրավական ռեժիմ է, այլ վախեցնելու ռեժիմ»:

«Այս նախագիծն այս տեսքով ընդունել չի կարելի, և այն փոփոխության պետք է ենթարկվի: Հիշեցնեմ, որ մարտի մեկ-երկուսի դեպքերն ուսումնասիրող ԱԺ ժամանակավոր հանձնաժողովը հատկապես անդրադարձել էր այս օրենքի ընդունման անհրաժեշտությանը: Որևէ սիմվոլիկա չգտնելով այս ամեն ինչի մեջ` ես կարծում եմ, որ այն, ինչ մենք անելու ենք մարտի մեկին (նկատի ունի վաղվա քվեարկությունը), անենք ի բարօրություն  մեր պետության, մեր ժողովրդի և ավելի ժողովրդավար Հայաստան ունենալու ձգտմանը համապատասխան»,- ասել է  Արծվիկ Մինասյանը:

ՀՀ արդարադատության նախարար Հրայր Թովմասյանը,  լսելով ելույթներն ու պատգամավորների մտահոգությունները, հայտարարել է, որ իր անունը գրավ է դնում և հավաստում, որ կառավարության կողմից այս օրենքի ընդունման հետ կապված որևէ դավ չկա: