«Հարբած մուժիկների էին բերում». Ռուսաստանում կլինեն բողոքներ, բայց ոչ հեղափոխություն. կարծիքներ

Ռուսաստանում երեկ կայացած նախագահական ընտրություններն ավելի ազնիվ են եղել, քան նախորդ տարվա դեկտեմբերին կայացած խորհրդարանականները, կարծիք են հայտնում մի շարք ռուսաստանցի քաղաքագետներ: Այնուամենայնիվ, նրանք Ռուսաստանի տարբեր քաղաքներում գալիք օրերին բողոքի ակցիաներ են ակնկալում:

Քաղաքական կոնյուկտուրայի կենտրոնի փոխտնօրեն, քաղաքագետ Ալեքսեյ Զուդինը РБК-ի հետ զրույցում նշել է, որ ոչ համակարգային ընդդիմության համար, որը վերջին ամիսներին հավաքներ էր կազմակերպում և քննադատում գործող իշխանություններին, ընդունելի չէ Վլադիմիր Պուտինի և ոչ մի հաղթանակ, այդ իսկ պատճառով մոտ ժամանակներս այն ակտիվ կերպով շարունակելու է պայքարել իր դիրքերի համար:

«Դա կլինի այսօր, վաղը, ընդհուպ մինչև Պուտինի երդմնակալության արարողությունը: Ցավոք, նման իրավիճակներում առաջին պլան են մղվում ծայրահեղական ուժերը, որոնք անկարգություններ կազմակերպելու ուղղվածություն ունեն: Հուսանք, որ նման բան տեղի չի ունենա», – ասել է Զուդինը:

Քաղաքագետի կարծիքով` այսօր երկիրը պատրաստ չէ հեղաշրջման:

«Այսպես թե այնպես, Պուտինին ընտրել է ՌԴ քաղաքացիների մեծամասնությունը», – համոզմունք է հայտնել Զուդինը:

Քաղաքական տեղեկատվության կենտրոնի գլխավոր տնօրեն Ալեքսեյ Մուխինը նույնպես կարծում է, որ նախագահական ընտրություններն ավելի ազնիվ են անցել, քան խորհրդարանականները:

Նրա խոսքով` լիարժեք մաքուր քաղաքական ընտրություններ անհնար է կազմակերպել, քանի որ «մարդկային գործոնը միշտ էլ առկա է»:

Մուխինը նշել է, որ ներկայիս ընդդիմության մի մասն ընտրություններից հետո կսկսի համագործակցել իշխանությունների հետ, մյուս մասը` ավելի կվատացնի հարաբերությունները:

«Լուրջ գործողությունների հնարավորություն իշխանության նկատմամբ չեմ տեսնում, քանի որ դա կարող է մեկնաբանվել որպես պետական հեղաշրջման փորձ: Հեղափոխություն չի լինի, բոլորը հստակ հասկանում են պատասխանատվության աստիճանը, այդ թվում` քրեական», – ասել է փորձագետը:

Քաղաքագետ Մարկ Ուռնովը, ի տարբերություն Մուխինի, լուրջ տարբերություններ նախագահական և խորհրդարանական ընտրությունների միջև չի նկատել:

«Մոսկվայում «կարուսելների» բազմաթիվ դեպքեր են գրանցվել, ավտոբուսներով հարբած մուժիկների էին բերում, ընտրատեղամասերից մեկում 150 քվեարկող էր, իսկ բերեցին հազարների: Ինչպես միշտ` խոստանում էին ազնիվ ընտրություններ, սակայն այդ փորձերը հերթական անգամ ձախողվեցին», – ասել է Ուռնովը:

Նրա կարծիքով` մոտ ժամանակներս փողոցներում բողոքի ակցիաներ կանցկացվեն:

«Մարդիկ զայրացել են` տեսնելով այդ կեղտը և լկտիությունը: Բայց բողոքների արդյունքները կախված են նրանից, թե արդյոք իրականում հնարավոր կլինի միավորել բոլոր ուժերը», – ասել է Ուռնովը: