«Արիական մշակույթ» ունեցող Հայաստանում կանանց կրթության վրա անիմաստ է փող ծախսել. կարծիք

21-րդ դարը պահանջում է, որ կինը լինի հավասար տղամարդուն իր ուժով ու հնարավորություններով: Այս մասին այսօր լրագրողների հետ հանդիպման ժամանակ հայտարարել է սոցիոլոգ Ահարոն Ադիբեկյանը` խոսելով 21-րդ դարի հայ կնոջ կերպարից:

Սոցիոլոգը հայտնել, որ իր ուսումնասիրությունը ցույց է տվել, որ «մենք արիական մշակույթի կրող ենք և տղամարդիկ ունեն դոմինանտ դեր հասարակությունում»:

«Մենք ուսումնասիրում էինք, թե կարող է արդյոք կնոջը դերը փոխվել տոտալիտար համակարգից անցում կատարելուց հետո:  Մեզանում կանանց դերը անկախությունից հետո չի փոխվել:  Թեև ընտրողների կեսից ավելին կանայք են, մեծամասնական ընտրատարածքներում կանանց թիվը համեստ էր: Հրանուշ Հակոբյանն էր միայն հնարավորթյուն ունենում հաղթել ընտրություններում` լինելով բացառիկ դեպքերից մեկը, երբ կինը կարողանում էր հաղթահարել գենդերային խնդիրները»,- նշել է բանախոսը:

Ասվածը հաշվի առնելով` Ադիբեկյանը կարծիք է հայտնել, որ կանանց կրթության վրա ծախսվող փողերը աննպատակ ծախս է, քանի որ գործազուրկների մեջ մեծ մասը կազմում են բարձրագույն կրթությամբ կանայք:

Ադիբեկյանի խոսքով` կանայք ակտիվ չեն ոչ միայն քաղաքականության, այլև ձեռներեցության մեջ: Ըստ բանախոսի` Հայաստանում գրանցված ընկերություններից միայն 18%-ի սեփականատերերն են կանայք: Ընդ որում` այդ տոկոսը մի մասն էլ  ձևական ղեկավարներն են, ում պատգամավոր ամուսինները ձևականորեն իրենց  բիզնեսները հանձնում են կանանց:

Ադիբեկյանը կանանց դիրքի ցածր լինելը պայմանավորում է նրանով, որ կանայք իրենց չեն գնահատում և սովոր են տղամարդուն ենթարկվել:

«Երբ որ ասում ենք դարձի տնօրեն, խորշում են լիդեր լինելուց, դրա պատասխանատվությունից: Ունենք ընդամենը երկու կին նախարար: Գյուղապետերի մեջ ընդամենը մի քանի կին կա: Դատական համակարգում համեմատաբար շատ են, քանի որ կանայք քիչ են կաշառք վերցնում», ասել է Ադիբեկյանը:

Կանայք ավելի կոնսերվատիվ են, կարծիք է հայտնել Ադիբեկյանը` ասելով, որ մինչ ամուսնությունը սեռական հարաբերություններ ունենալու փորձը կարևոր են համարում հայ տղամարդկանց  40%, մինչդեռ կանանց` 30 %-ը:

«Այնքան ազատական չենք, որքան կարող էինք լինել մեր ժողովրդավարության մակարդակի պայմաններում: Սակայն, թե դառնանք եվրոպական կյանքի, ավելի շուտ կանհետանանք, քան անհետանում ենք:  Եթե մնանք ասիական,  կմնանք հետամնաց և կշատանա արտագաղթը», – ասել է Ադիբեկյանը` հույս հայտնելով, որ «հասարակությունը կգտնի ոսկե միջինը»:

Լուսանկարը` zazzle.com