Թուրքական բանտից ազատեցին Դինքի մասին գրքի հեղինակին

Երկուշաբթի կեսօրին Թուրքիայում ազատ են արձակվել ծայրահեղական «Էրգենեկոն» ահաբեկչական կազմակերպության հետ համագործակցելու կասկածանքով նախորդ տարի ձերբակալված 4 լրագրողների:

Ազատ արձակված 4 լրագրողների թվում են նաև Հրանտ Դինքի մասին երկու գրքերի հեղինակ, հայտնի լրագրող Նեդիմ Շեները և հետաքննող լրագրող Ահմեդ Շիկը:

Շեները և Շիկը ձերբակալվել էին նախորդ տարվա մարտին: Նրանց ձերբակալությունը մտահոգության առիթ էր ստեղծել Թուրքիայում`կապված ԶԼՄ-ների և խոսքի ազատության խնդիրների հետ: ԱՄՆ-ն, ԵՄ-ն և իրավապաշտպան կազմակերպությունները դատապարտում էին լրագրողների ազատազրկումը, որը ըստ նրանց, բացասաբար է ազդում Թուրքիայի` Միջին Արևելքում որպեսի ժողորդավարության մոդելի իմիջի վրա:

Մյուս երկու կասկածյալներ` Չոշկուն Մուսլուկը և Սաիթ Չակիրը նույնպես ազատ են արձակվել:

Միաժամանակ Ստամբուլի դատարանը հրաժարվել է ազատ արձակել գործով անցնող ևս 6 լրագրողների:

Եթե նրանց մեղքը հաստատվի յուրաքանչյուրը 15 տարվա ազատազրկման կդատապարտվի:

Հաջորդ նիստը տեղի է ունենալու հունիսի 18-ին:

Լրագրողներն իրենց դեմ հարուցված քրեական գործը քաղաքանապես մոտիվացված են համարում և որպես «արդարության սպանդ» են որակում:

Նշենք, որ Թուրքիան կալանքի տակ է պահում լրատվական դաշտի հետ առնչություն ունեցող 100 մարդկանց, թեև իշխանությունները հայտարարում են, որ նրանք բանտում են ոչ իրենց մասնագիտական գործունեության համար: