Epress.am Լուրեր Հայաստանից
Երևանի տարբեր վարչական շրջանների դպրոցների 115 պատանիներ այսօր 115 մեխակներ են դրել Եղիշե Չարենցի հուշահամալիրին՝ նրա ծննդյան 115-ամյակի կապակցությամբ:
«Լավ կլիներ, իհարկե, որ բոլոր տղաները գանգրահեր լինեին, նույնիսկ հումոր արեցին, թե հիմա կա գանգրացնելու հնարը, բայց թե հայ տղային չես տանի արհեստականորեն գանգրացնելու՝ ովքեր գանգրահեր են,ովքեր էլ ոչ, միևնույն է մասնակցելու են: Մտահաղացումը Երևանի Քաղաքապետարանի կրթության բաժինն է: Ընտրությունը կատարվել է տարբեր դպրոցների պատանիների շրջանում:
Պատվիրվել էին վերնազգեստներ՝ չարենցյան տողերով ու կեպիներ` Չարենց 115 գրությամբ, սակայն, որպեսզի երեխաները չմրսեն, մտածեցինք «Գանգրահեր տղայի» կերպարով նշանավորել այս օրը: Չարենցը պատվիրել է ամուր պահել մեր երկիրը, մենք էլ տեր ենք այդ պատգամին ու երթով հաստատում ենք այն», -Epress.am- ի հետ զրույցում ասել է Երևանի քաղաքապետարանի հանրակրթության վարչության պետի տեղակալ Սիլվա Աչոյանը:
Եղիշե Չարենցի Տուն-թանգարանից մեկնարկած երթին մասնակցում էին Գրողների միության նախագահ Լևոն Անանյանը, քաղաքապետարանի ներկայացուցիչներ, հանրակրթական դպրոցների ուսուցիչներ ու աշակերտներ:
Ի դեպ՝ չարենցյան «գանգրահեր տղաների» հետ հուշահամալիր էին շարժվում նաև տարբեր դպրոցների աշակերտուհիներ:
«Աղջիկներին ասել էինք, որ հնարավորինս քիչ երևան երթի ընթացքում, սակայն, ինչպես տեսնում եք՝ միացել են իրենց դասընկեր գանգրահեր տղաներին», – ասել է Աչոյանը և հավելել, որ նմանատիպ միջոցառումներով Չարենցը ոչ թե կտարալուծվի, այլ կամբողջանա երեխաների մեջ:
Հատված Եղիշե Չարենցի «Գանգրահեր տղան» բանաստեղծությունից.
…Նայում է ապա նա փոշոտ քարին
Աղեղանման հոնքերի տակով…
Գրված է վրան.— «Եղիշե Չարենց,
Բանաստեղծ, ծնված Մակու
քաղաքում»: Կարդում է նա իր աչքերով ծավի,
Ժպտում է, հիշում կարծես ինչ-որ բան,
Քաղում է ապա մի կանաչ բաղեղ —
Ու շարունակում իր թողած ճամփան:
Ծիծաղով հնչուն ու արծաթաձայն
Միանում է նա կրկին շարքերին —
Եվ, հուշի նման հավիտյան անցած,
Մնում է հանդում մի կորած շիրիմ…
Լսո՞ւմ ես՝ այդտեղ իմ սի՛րտն է թաղած,
Կոխոտի՛ր նրան քայլերով քո լույս,
Օ, դո՛ւ, գալիքի գանգրահե՛ր տղա,
Մեր լա՛վ գալիքի ոսկեհե՛ր մանուկ…
