Անքնությունը կապում են շաքարախտի և սիրտ-անոթային հիվանդությունների հետ

Մարտի 16-ը որպես քնի խանգարումների դեմ պայքարի օր այս տարի նշվում է նաև  Հայաստանում: Այսօր «Քնի խանգարումների հայկական ասոցիացիայի» նախագահ Սամսոն Խաչատրյանը լրագրողների հետ հանդիպման ժամանակ նշել է, որ քնի խանգարումների տակ պետք չէ հասկանալ միայն անքնությունը՝ այն իր մեջ ներառում է մի շարք վտանգավոր խնդիրներ՝ քնի շնչառական խանգարումներ, լուսնոտություն, գիշերային էպիլեպսիաներ, անհանգիստ ոտքերի ախտանիշ:

«Վերը թվարկվածներն անմիջապես կապ ունեն շատ այլ կարևոր առողջապահական խնդիրների՝ սիրտ-անոթային ու նյարդ-անոթային համակարգի, զարկերակային գերճնշումների, շաքարային դիաբետի, տարբեր նյարդահոգեկան շեղումների հետ», – ասել է Խաչատրյանը:

Նրա հավաստմամբ` բժշկությունն այսօր չի կարող նշել նորմալ քնի ժամերի տևողությունը:

«Հնարավոր է նշել միջակայքը, որի ընթաքում քնելը համարվում է նորմալ՝  5-ից 8 ժամ: Հետազոտությունների շնորհիվ 5 ժամից պակաս քնողների և նույնիսկ 8 ժամից ավել քնող մարդկանց մոտ հիվանդացությունն ու մահացությունը ընդհանուր բոլոր պատճառների գումարով ավելի բարձր է, քան 5-8 ժամ քնողների մոտ: Քնի խանգարումները բերում են լուրջ խնդիրների», – ասել է Խաչատրյանն ու կարևորել հատկապես  խանգարումներից երկուսը՝ անքնությունն ու շնչարգելությունը քնի ժամանակ:

«Այդ խնդիրներն ուղղակի կապ ունեն շաքարային դիաբետի ու սիրտ-անոթային հիվանդություննրի հետ: Շնչարգելության պատճառներից մեկն էլ ավելորդ քաշն է: Այնքան էլ դժվար չէ քնի խանգարումներ ունեցողին եթե ոչ ինքնուրույն, ապա մասնագետի օգնությամբ կանխել  անքնությունը: Արտասահմանյան գրականության մեջ  «Լռակյաց մարդասպան» համարվող այս խնդիրը հիվանդը կարող է սկզբնական շրջանում, գուցե նաև տարիներ շարունակ չնկատել, ինչը հետագայում  բերում է մահվան քնի ժամանակ», – ասել է Խաչատրյանը:

Նա խորհուրդ է տվել նման խնդիրների դեպքում  դիմել մասնագետի օգնությանն ու պարզել անքնության առաջնային խնդիրները:

«Սրանից է կախված՝ բուժումը կշարունակվի դեղորայքային, թե այլ կերպ: Կարևոր է պարզել անքնության նախնական փուլը: Ցավոք, այսօր Հայաստանում  դեղորայքային բուժումը հիմնավոր չի կատարվում՝ դեղորայքը պետք է էֆեկտիվ լինի և քանի որ մեր հասարակությունում տարածված է բուսական միջոցների  բուժման գաղափարը և խրոնիկական լուրջ խնդիրների դեպքում բուսական թույլ դեղերը կարող են պարզապես վատացնել բուժման ընթացքը, չնպաստել ճիշտ բուժմանը», – ասել է Խաչատրյանը: