Դիտորդին ծեծի ենթարկելու առթիվ քրեական գործ հարուցվեց. տուժող կողմը համաձայն չէ հոդվածի հետ

Հելսինկյան ասոցիացիայի դիտորդ Արման Վեզիրյանին ծեծի ենթարկելու փաստի առթիվ այսօր ՀՀ քրեական օրենսգրքի 118 հոդվածի հատկանիշներով (ծեծ) քրեական գործ է հարուցվել:

Այս մասին Epress.am-ի հետ զրույցում ասել է Հելսինկյան ասոցիացիայի ներկայացուցիչ, Վեզիրյանի փաստաբան Նինա Կարապետյանցը:

Հիշեցնենք, որ ապրիլին 30-ին, թիվ 11 ընտրատարածքում առաջադրված ՀԱԿ-ի թեկնածու Արշակ  Բանուչյանի նախընտրական շտաբի ակտիվիստները նախընտրական քարոզչանյութեր են բաժանելիս եղել և բուկլետներից մեկը դրել են տներից մեկի մուտքի մոտ: Տանից դուրս է եկել մոտ 45 տարեկան տղամարդ և սկսել է  բղավել` «էսի հըլը վեկալեք ու ռադ ըլեք ստեղից»: Բուկլետ դնող երիտասարդը ներողություն է խնդրել, իսկ միջադեպի վայրում ներկա Արման Վեզիրյանը, ով որպես դիտորդ հետևում էր քարոզարշավի ընթացքին, մոտեցել է բուկլետը վերցնելու համար: Այդ պահին տղամարդը հարվածել է իրավապաշտպանի դեմքին, որի հետևանքով նրա աչքի տակ այտուցվել է:

Նինա Կարապետյանցը տեղեկացրել է, որ իրենք համարում են` միջադեպի վերաբերյալ ևս մեկ հոդվածով պետք է քրեական գործ հարուցվի, քանի որ Վեզիրյանը որպես դիտորդ է այնտեղ ներկայացել, և, իրենց կարծիքով, պետք է նաև քրեական գործ հարուցվեր ՀՀ քրեական օրենսգրքի 149 հոդվածով (դիտորդի լիազորությունների իրականացմանը խոչընդոտելը):

«118 հոդվածը` ծեծ, դիտորդի հետ կապ չունի, այսինք ստացվում է  կենցաղային հողի վրա վիճաբանել են: Բայց այս դեպքում դիտորդի աշխատանքը իրականացնելուց են ծեծի ենթարկել: Մենք պահանջում ենք, որ նաև 149 հոդվածով քրեական գործ հարուցվի: Երբ դա ասեցինք, քննիչը գնաց, դատախազի հետ խորհրդակցեց, եկավ ասեց, որ այս պահին իրենք որոշեցին, որ 118 հոդվածով են հարուցելու քրեական գործը: Հետո ավելի ուշ հնարավոր է, որ փոփոխություն լինի: Իհարկե, մենք այդ գործը պետք է բողոքարկենք, եթե այս երկու օրվա ընթացքում քննիչն իր որոշումը չփոխեց»,- ասել է Նինա Կարապետյանցը: