Ազգայնականների ակցիան ուղղորդված էր վերևից, վստահ են իրավապաշպանն ու գրողը (ՏԵՍԱՆՅՈՒԹ)

Երեկ մշակութային բազմազանության համաշխարհային օրվան նվիրված երթի դեմ ազգայնականների կողմից անցկացված բողոքի ակցիան, ըստ իրավապաշտպան Միքայել Դանիելյանի, իրականում կազմակերպված էր իշխանությունների կողմից: Այս մասին իրավապաշտպանն ասել է լրագրողների հետ հանդիպման ժամանակ:

«Սա շատ հարմար էր, ընտրություններից հետո, մոռացնել տալու դրա խայտառակությունը, որ ապացուցեց, որ ժողովրդավարություն չկա Հայաստանում: Սա առաջինն էր կազմակերպված իշխանության կողմից և էլի է լինելու», – ասել է Դանիելյանը:

Իրավապաշտպանը նկատել է, որ հանդուրժողականություն Հայաստանում չկա` ոչ իշխանությունների, ոչ իրավապաշտպանների, ոչ լրագրողների կողմից:

Ասուլիսի մեկ այլ մասնակից, ՄԱԿ-ի գլխավոր քարտուղարի խորհրդական Գյուլնարա Շահինյանն ավելի լավատեսական դիրքորոշում է արտահայտել:

Նրա խոսքով` մարդու իրավունքների վիճակը Հայաստանում այնքան էլ վատ չէ, և շատ խնդիրներ, օրինակ, թրաֆիքինգը, մանկատների հիմնահարցերը, որոնք հասարակությունը մի քանի տարի առաջ չէր էլ ուզում քննարկել, այժմ օրինական ձևակերպումներ են ստացել:

Լրագրողների հետ հանդիպմանը ներկա գրող, հրապարակախոս Մարինե Պետրոսյանը համաձայնել է Դանիելյանի հետ առ այն, որ ազգայնականների ակցիան կազմակերպված էր և ինքնաբուխ բնույթ չէր կրում: Հրապարակախոսը նշել է, որ կազմակերպիչներից մեկն էր բլոգեր Տիգրան Քոչարյանը (մականունը` Փիղ): Պետրոսյանը նշել է, որ, վերլուծելով տարածաշրջանում նման պրոցեսները ևս, կարելի է ասել, որ դա Ռուսաստանից ուղղորդվող ծրագիր է:

«Սա արվում է, որպեսզի մենք խնդրենք, որ ռուսական բանակը գա, մեզ փրկի: Ուզում են, որ միասեռականների իրավունքներով տարվելով` մարդիկ մոռանան այլ իրավունքների մասին, ինչը նաև մեր իշխանությունների շահերից է բխում: Բայց դա շատ կարճատես ծրագիր է, քանի որ եթե Հայաստանը փլվի, առաջին հերթին, իշխանության գլխին է փլվելու», – ասել է Մարինե Պետրոսյանը: