75՝ կողմ, 47՝ դեմ, 1՝ ձեռնպահ. Կառավարության ծրագիրն ընդունվեց

ՀՀ Ազգային Ժողովը այսօրվա նիստում ձայների 75՝ կողմ, 47՝ դեմ, 1՝ ձեռնպահ հարաբերակցությամբ հաստատել է նախօրեին  կառավարության կողմից ներկայացված ծրագիրը: Հիշեցնենք, որ ՀՀ կառավարության ծրագիրը մշակվել է Հայաստանի Հանրապետության ազգային անվտանգության ռազմավարության, ՀՀ նախագահի, Հայաստանի Հանրապետական կուսակցության և «Օրինաց երկիր» կուսակցության նախընտրական ծրագրերի հիմնական դրույթներին համապատասխան: Այս մասին կառավարության ծրագիրը երեկ ԱԺ-ում ներկայացնելիս ասել էր ՀՀ վարչապետ Տիգրան Սարգսյանը:

Ըստ վարչապետի` նոր ծրագրի համաձայն՝ Հայաստանի տնտեսությունը պետք է լինի մրցունակ, խրախուսվելու են նորարարական բիզնեսները, ստեղծվելու են նպաստավոր պայմաններ Հայաստանի տնտեսության մեջ սփյուռքահայերի ներգրավվածության ավելացման և ներդրումների խրախուսման համար, կարևորվելու են նաև գյուղի և գյուղատնտեսության խնդիրները: Կառավարությունը մեծ ուշադրություն է դարձնելու կրթության ոլորտին և  ինստիտուցիոնալ կարողությունների զարգացմանը:

Վարչապետը նշել էր, որ ՀՀ կառավարությունը սույն ծրագրի իրականացմամբ 2012-2017 թվականների ընթացքում նպատակադրում է՝

• զարգացած երկրների համեմատ տնտեսական աճի առաջանցիկ տեմպերի ապահովում` համախառն ներքին արդյունքի 5-7 տոկոս աճի ապահովման միջոցով,

• ներմուծման նկատմամբ արտահանման աճի առաջանցիկ տեմպերի ապահովում,

• նվազագույն աշխատավարձի մակարդակի առնվազն կրկնապատկում,

• նվազագույն աշխատավարձ/աղքատության գիծ ցուցանիշի առնվազն 140 տոկոս մակարդակի ապահովում,

• ծնելիության գումարային գործակցի աճ` մինչև 1.8-ի,

• 5-6 տարեկան երեխաների համար նախադպրոցական կրթության առնվազն 90 տոկոսով հասանելիության ապահովում,

• միջին աշխատանքային (ապահովագրական) կենսաթոշակի մակարդակի բարձրացում՝ հասցնելով աղքատության գծի համեմատ 125-135 տոկոսի,

• աղքատության կրճատման ապահովում՝ 8-10 տոկոսային կետով,

• 100 հազարից ավելի նոր աշխատատեղերի ստեղծում, ընդ որում, ոչ գյուղատնտեսական զբաղվածություն ունեցողների թիվը կավելանա 30-50 հազարով,

• պետական եկամուտների հավաքագրման մակարդակի աճի ապահովում՝ տարեկան համախառն ներքին արդյունքի 0.3 – 0.4 տոկոսային կետի չափով: