ՀԱԿ-ի ակտիվիստների գործում ներգրավված վկան ձերբակալվել է թմրամիջոցների շրջանառության համար

Օգոստոսի 17-ին Երևանում կալանավորվել է ԱՄՆ քաղաքացի Ալեքս Միրզոյանը, գրում է «Հայկական ժամանակ»:

Թերթը նշում է, որ վերջինիս անձը հետաքրքիր է այնքանով, որ նաև նրա ցուցմունքների հիման վրա` ՀԱԿ չորս երիտասարդներ երկու ամիս առաջ դատապարտվեցին 2-6 տարվա ազատազրկման:

Մինչև երեկ ՀՀ իրավապահներն այս լուրը ճշտելու թերթի թղթակցի հարցումներին տալիս էին ժխտողական պատասխան:

«Երեկ, սակայն, ՊԵԿ-ի հասարակայնության հետ կապերի վարչությունից մեր թղթակցին հայտնել են, որ Միրզոյանը օգոստոսի 17-ից կալանավորված է իրենց քննչական վարչությունում քննվող գործի շրջանակներում, մեղադրվում է ՀՀ քրեական օրենսգրքի 215-րդ հոդվածի 2-րդ մասով (մաքսանենգություն, պատժվում է մինչև 5 տարվա ազատազրկմամբ) և 268-րդ հոդվածի 2-րդ մասի 2-րդ կետով (խոշոր չափերով թմրամիջոցների ապօրինի շրջանառությունն առանց իրացնելու նպատակի, պատժվում է մինչև 3 տարի ազատազրկմամբ): Այսօր, ժամը 12.00-ին վերաքննիչ դատարանը կսկսի դատապարտված երիտասարդների բողոքի քննությունը: Հուսանք, որ թմրամոլ վկայի ցուցմունքները վերաքննիչ դատարանն առնվազն կասկածի տակ կառնի»,- գրում է թերթը: