Սիրիահայերի համար Երևանում դպրոց բացեցին

Երևանի քաղաքապետ Տարոն Մարգարյանը մասնակցել է քաղաքապետարանի   աջակցությամբ և «Կիլիկյան Բարեսիրական Միության» հովանավորությամբ Երևանի Նար-Դոսի անվան թիվ 14 դպրոցում  սիրիահայ երեխաների համար, սիրիական  ծրագրով կազմավորված հիմնական հանրակրթական դպրոցի բացմանը: Այս մասին հաղորդում է Երևանի քաղաքապետարանի կայքը:

«Կիլիկյան»  դպրոցում կրթություն կստանան 1–9 րդ դասարանների սիրիահայ աշակերտներ, որոնց թիվն այսօր Հայաստանում արդեն հասնում է 220-ի:

«Այսօր արդեն ավելի քան 200 սիրիահայ երեխա կհաճախի նորաբաց այս դպրոցը: Քաղաքապետարանը առաջին իսկ օրից եղել է սիրիահայ ընտանիքների կողքին և շարունակելու է իր լիազորությունների շրջանակում օժանդակել այդ ընտանիքներին: Երևանի ավագանու որոշմամբ մենք լուծեցինք նաև նախադպրոցական տարիքի սիրիահայ երեխաների կրթության խնդիրը, որի շրջանակում այսօր 58 երեխա արդեն իսկ անվճար հաճախում է մանկապարտեզ», – նշել է քաղաքապետը: