Ով է կրակել Սերժ Սարգսյանի անվտանգության ծառայության մեքենայի վրա. մանրամասներ

Ոստիկանությունը մանրամասներ է ներկայացրել նոյեմբերի 21-ին, ժամը 1-ին «Զվարթնոց» օդանավակայանի ճանապարհին տեղի ունեցած միջադեպի մասին, որի ժամանակ մի տղամարդ ավտոմեքենայի միջից կրակել է Սերժ Սարգսյանի անվտանգության աշխատակիցների ուղղությամբ։

Ոստիկանության լրատվական ծառայությունից հայտնել են, որ «Օպել  Վեկտրա» մակնիշի ավտոմեքենան, որի միջից տղամարդը կրակել է «ՎԱԶ 2121» մակնիշի ավտոմեքենայի վարորդի ուղղությամբ, հայտնաբերվել է Կ.Դեմիրճյանի անվան մարզահամերգային համալիրին հարող տարածքում: Մեքենայում հայտնաբերվել է 9 մմ տրամաչափի 2 փամփուշտ, նույն տրամաչափի պարկուճ, վարորդի՝  Աշոտ Կ.-ի փաստաթղթերը: Դեպքի վայրի զննությամբ՝ Ծովակալ Իսակովի  պողոտայի 2 հասցեին հարող տարածքում, հայտնաբերվել է 9 մմ տրամաչափի մեկ պարկուճ:

Փաստի առթիվ  նոյեմբերի 21-ին ոստիկանության Մալաթիայի քննչական բաժնում հարուցվել է քրեական գործ ՀՀ քրեական օրենսգրքի 34-104 հոդվածի 1-ին մասով (հանցափորձ, սպանություն) և 235 հոդվածի (ապօրինի կերպով զենք պահելը, կրելը, փոխադրելը) 1-ին մասով:

Նոյեմբերի 21-ին նշված հանցագործությունը կատարելու կասկածանքով ոստիկանություն բերման է ենթարկվել Էջմիածին քաղաքի բնակիչ, 49-ամյա Աշոտ Կ.-ն, ում ձախ ոտքի շրջանում հայտնաբերվել է հրազենային վնասվածք, և բժշկական օգնություն ստանալու նպատակով նրան տեղափոխել են «Մալաթիա» բժշկական կենտրոն: Աշոտ Կ.-ն հայտնել է, որ չի հիշում՝  ինչ է տեղի ունեցել իր հետ: Նույն օրը  նրա ձերբակալելու մասին որոշում է կայացվել:

Նոյեմբերի 22-ին  Աշոտ Կ.-ի կինը ոստիկանության Վաղարշապատի բաժին է ներկայացրել  «Մակարով»  ատրճանակ՝  հայտարարելով, որ հայտնաբերել է իրենց տան մոտ, փողոցում դրված աղբամանի մեջ:

Աշոտ Կ.-ն ցուցմունք է տվել, որ  նոյեմբերի 20-ին ինքը օղի է խմել ծնողների շիրիմի մոտ, հետո որոշել է գալ Երևան: Ճանապարհին  իր ավտոմեքենայով վթարի է ենթարկվել և դիմել փախուստի: Հասնելով Կ. Դեմիրճյանի անվան մարզահամերգային համալիրի մոտ՝ նկատել է մի ավտոմեքենա, որն իրեն նախազգուշացնող ազդանշան է տվել: Նրան վախեցնելու նպատակով՝ նստելատեղի կողային հատվածից  վերցրել է  ապօրինի պահվող «Մակարով» ատրճանակը և մեկ անգամ օդ կրակել: Հետո փորձել է ատրճանակը դնել նստելատեղի ձախ հատվածում, որի ժամանակ պատահամամբ կրակել է իր ձախ ոտքին ու ստացել հրազենային վնասվածք: Դրանից հետո ևս 4-5 րոպե վարելով՝ մեքենան թողել է փողոցում ու տաքսիով գնացել տուն:

Նշանակվել են դատաբժշկական, դատակենսաբանական, դատաձգաբանական և դատաքիմիական  համալիր փորձաքննություններ:

Նախաքննությունը  շարունակվում է: