«Միասնական թեկնածու». Պարույր Հայրիկյանն առաջարկում է միավորվել իր ծրագրի շուրջ

ՀՀ նախագահի թեկնածու, ԱԻՄ նախագահ Պարույր Հայրիկյանը կոչ է արել բոլոր ընդդիմադիր թեկնածուներին միավորվել և միասնական թեկնածու առաջադրել 2013 թվականի փետրվարի 18-ին կայանալիք նախագահական ընտրություններին: Այս մասին նա հայտարարել է այսօր լրագրողների հետ հանդիպման ժամանակ:

Հայրիկյանի խոսքով՝ այդ դեպքում միասնական թեկնածուն կհավաքի մեկուկես անգամ ավելի շատ քվեներ, քան առանձին թեկնածուների հավաքած տոկոսների հանրագումարն է:

Հայրիկյանը հիշեցրել է, որ դա մաթեմատիկական հաշվարկ է, որն ապացուցվել է 1996 թվականի նախագահական ընտրությունների ժամանակ, երբ ինքը, մասնավորապես, իր թեկնածությունը հանել է օգուտ Վազգեն Մանուկյանի:

Այս անգամ, սակայն, Հայրիկյանը չի ցանկանում պաշտպանել որևէ ամբիցիոզ թեկնածուի: Նա նշել է, որ հարկավոր է թողնել ամբիցիաները և միավորվել ծրագրի շուրջ:

Նախագահի թեկնածուն ունի միավորման համար մեկ նախապայման՝ հայ ժողովրդի ճակատագիրը պետք է որոշի միայն հայ ժողովուրդը: Նրա խոսքով՝ միայն ինքն ունի ծրագիր, որը հիմնված է այդ սկզբունքի վրա:

Նա նշել է, որ, ի տարբերություն 1996 թվականի, երբ նպատակ կար «մեր դեմ խաղ չկա» սկզբունքով գործող իշխանությունը տապալել, այս անգամ իր նպատակն է Հայաստանը դարձնել կատարյալ ժողովրդվարություն ունեցող երկիր, որին գնալու ուղին ինքը գիտի: