Home / Հայաստան / Զոհված զինվորների մայրերը եկել էին «շնորհավորելու» Սերժ Սարգսյանին (ՏԵՍԱՆՅՈՒԹԵՐ)

Զոհված զինվորների մայրերը եկել էին «շնորհավորելու» Սերժ Սարգսյանին (ՏԵՍԱՆՅՈՒԹԵՐ)

Բանակում խաղաղ պայմաններում զոհված զինծառայողների ծնողներն այսօր նախագահական նստավայր էին եկել՝ «շնորհավորելու» գերագույն հրամանատար, ՀՀ նախագահ Սերժ Սարգսյանին՝ հայոց բանակի կազմավորման 21-րդ տարեդարձի կապակցությամբ: Еpress.am-ի թղթակցին մայրերը պատմել են, որ նախագահական նստավայր չէին հասնի, եթե այսօր, պայմանավորվածության համաձայն, իրենց ընդուներ զինդատախազ Գևորգ Կոստանյանը:

Օրեր առաջ ՀՀ նախագահի նամակների և քաղաքացիների ընդունելության բաժնի պետ Աիդա Ասատրյանը զանգահարել է մայրերից մեկին ու հաղորդել, որ զինդատախազ Գևորգ Կոստանյանը պատրաստ է հանդիպել իրենց:

«Զանգել եմ զինդատախազության թեժ գիծ, ներկայացել եմ, ու ասել, որ նախագահականից մեզ ասել են, թե Կոստանյանը ընդունելու է ծնողներին, ես էլ ուզում եմ տեղեկանալ՝ ե՞րբ կարող ենք գալ, որովհետև ծնողներից մի քանիսը պետք է գան շրջաններից: Ինձ պատասխանեցին, որ հինգշաբթի զանգ տամ, նաև ավելացրին, որ ուրբաթ օրը ժամը 15:00-ին լինենք դատախազության մոտ: Երեկ զանգում եմ, ասում են՝ «ուրբաթ առավոտը զանգեք», այսօր առավոտյան ժամը 10:15-ից մինչև 11:30 անընդհատ զանգել եմ թեժ գծի նույն համարին, զանգերիս պատասխանող չկա»,- պատմել է 2007թ. Գեղարքունիքի մարզի Կարճաղբյուր գյուղի զորամասում զոհված զինծառայող Տիգրան Օհանջանյանի մայրը՝ Գոհար Սարգսյանը:

Նախագահական նստավայրի դարպասների մոտ կանգնած բողոքող մայրերին թվով 3 տասնյակի հասնող ոստիկաններն ամեն կերպ հորդորել են հեռանալ դարպասներից ու ակցիան շարունակել նստավայրից հեռու, ինչին ի պատասխան կանայք պատասխանել են՝ «թող Սերժը դուրս գա, պատասխան տա, կհեռանանք»:

«Ինչքա՞ն կարելի է, երեխա ենք ուղարկել բանակ, ու՞մ համար՝ Սերժի՞: Հիմա էլ  կրկնակի թեկնածություն ա դնում, քիչ ա լափել, հիմա էլի 5 տարի պիտի զինվորների գլուխը ուտի, քիչ կերավ էս 5 տարում մեր էրեխեքի արյունը», – բողոքել է 2010 թվականին զոհված զինծառայող Արթուր Ղազարյանի մայրը՝ Իրինա Ղազարյանը:

Սևազգեստ մայրերը պնդել են, որ ոչ մի քայլ չեն հեռանա դարպասներից, մինչև  անձամբ նախագահից չստանան իրենց հարցերի պատասխանները՝ մասնավորապես՝«ո՞նց կարելի է 18-19 տարեկան տղաներին սպանել ու անպատիժ մնալ», «դատաիրավական համակարգում ի՞նչ փոփոխություններ է պատրաստվում անել» կամ «հավատացինք, սակայն ի՞նչը փոխվեց»:

«Գոնե թող դուրս գա, շնորհավորենք բանակի կապակցությամբ՝ իր անցած տարիների, որ պաշտպանության նախարար է եղել, ոնց է եղել զինվորականների հետ զորքերում, ի վերջո պատերազմ անցած մարդ է, նախընտրական հոլովակներում շնորհակալություն է հայտնում զինվորների ծնողներին,  ի՞նչ է՝ միայն շոու է ու վե՞րջ», – ասել է Սարգսյանը՝ հիշեցվելով, որ նախագահն ինքն է ասել, որ ամենից շատ ինքն է շահագրգռված սպանությունները բացահայտելու մեջ ու մինչև վերջ հետամուտ կլինի:

Սևազգեստ կանանց դարպասների մոտից հեռացնելու համար ոստիկանները խոստացել են ուղեկցել նախագահի նամակների և քաղաքացիների ընդունելության բաժնի պետի մոտ, ինչը մայրերը մերժել են:

«Ի՞նչ եք ուզում, կանգնած ենք, էսօր ինքը՝ նախագահը, չի գալիս մեզ մոտ, մենք ենք եկել: Թող հանձն առնի, որ դատախազության վրա չի կարա, մենք էլ էստեղ չենք գա», – ասել է Տիգրան Օհանջանյանի հայրը՝ Սուրեն Օհանջանյանը:

Ծնողներն իրենց դժգոհությունն են արտահայտել Սերժ Սարգսյանի՝ «Դեպի ապահով Հայաստան» կարգախոսի վերաբերյալ, ընդգծելով, որ զինվորներին վերացնելով ապահով Հայաստան չեն ստեղծում:

«Շաբաթը երկու զիվորի դիակ բերելով՝ ապահով երկիր չի լինի, զինվորներն են պահպանում մեր սահմանները, էլ ի՞նչ ապահով Հայաստանի մասին է խոսքը: Հայաստանը իրենք ջնջում են երկրի երեսից, որ հետո ոսկյա սկուտեղի վրա  մատուցեն թուրքերին: Ի՞նչ ընտրություն, ի՞նչ քարոզարշավ, հիմա էլ պիտի գնանք իրեն ընտրե՞նք: Թող իմ երեխու սպանողին պատժի, ամբողջ ազգիս հետ գնամ իրեն ընտրեմ», – ասել 2010թ. զոհված զինծառայող Վալերի Մուրադյանի մայրը՝ Նանա Մուրադյանը:

Գոհար Սարգսյանի խոսքով՝ «ի՞նչքան կարելի է անպատիժ Հայստանում մնալ ապահով» ու ի՞նչպես կարելի է նման կարգախոս ընտրել՝ «բա ինքը ո՞նց կարող է նայել մեր աչքերին ու ասել՝ «Առաջ Հայաստան»»:

«Այսօր, երբ մենք ասուլիս էինք տալիս, մեր գերագույն հրամանատարը մեդալներ է բաժանել հրամկազմին, իր զինակից ընկերներին, մարդասպաններին, ովքեր մեր երեխեքին են սպանել, իհարկե, հիմա մեզ ընդունել չի ուզենա: Վերջապես նախագահ է, թող ասի՝ ինչո՞ւ է մարդասպանի ձեռքը բռնում, մարդասպա՞նն է  այսօր իր ապահով Հայաստանը պահելու ու մեր երեխեքի հաշվի՞ն»,- հարցրել է Գոհար Սարգսյանը:

Նշենք, որ այսօր զինծառայողների ծնողները ասուլիս էին կազմակերպել, որտեղ հերթական անգամ բարձրաձայնել են, որ իրենց որդիներին բանակում սպանել են, իսկ պաշտոնական վարկածը կեղծիք է, և այդ կեղծիքները շարունակվել են նախաքննության ժամանակ, իսկ հետո՝ դատավարությունների: Ծնողները նաև նշել են, որ իրենց որդիներին սպանած և նրանց գործերը կեղծած մարդկանց պատժելու փոխարեն այսօր նրանց պարգևատրում են:

Նշենք նաև, որ մինչև զինծառայողների ծնողների ասուլիսը նույն մամուլի ակումբում ասուլիս էր տալիս ՀՀ նախագահի թեկնածու Րաֆֆի Հովհաննիսյանը, ով իր ասուլիսից հետո մոտեցել է զոհերի հարազատներին, ողջագուրվել է և կարճատև զրույց ունեցել Արտակ Նազարյանի մոր՝ Հասմիկ Հովհաննիսյանի հետ: