ՏԵՍԱՆՅՈՒԹ. «Անում եմ մի բան, որ առաջին անգամ եմ անում». Բագրատյանը քվեարկեց

ՀՀ նախագահի թենկնածու Հրանտ Բագրատյանը քվեարկել է բոլորովին նոր Հայաստանի համար: Նա կարծում է, որ այն Հայաստանը, որն ունենք վերջին տարիներին, իրեն սպառել է բոլոր առումներով և զարգանալ, առաջ գնալ չի կարող:

Մուշեղ Գալշոյանի թիվ 148 դպրոցում իր քաղաքացիական պարտքը կատարելուց հետո Բագրատյանը  պատասխանել է լրագրողների հարցերին, մասնավորապես, լրագրողի հարցին, թե ինչ զգացողություն ունի ինքն իրեն ընտրելուց հետո:

«Անում եմ մի բան, որ առաջին անգամ եմ անում», – ասել է Բագրատյանը:

Հաղթելու դեպքում նախագահի  թեկնածուն մտածել է՝ ինչ է անելու, իսկ պարտվելու մասին մտածել չի ուզում:

«Հաղթելուց հետո գրաֆիկ եմ կազմելու՝ ժամ առ ժամ ինչ ենք անելու, ու չեմ կարծում, թե ընդհանրապես կարող է լինել պարտություն՝ մինչև 3-4 օր առաջ ավելի օպտիմիստ էի, բայց մասսայական ընտրակաշառքները, որ տեսա, հիասթափեցրին», ասել է Բագրատյանը՝ հավելելով, որ բոլորն էլ ընդունում են, որ միակ ալտերնատիվ ներկայացված մոդելը ինքն է:

Հետընտրական սցենարների մասին նախագահի թեկնածուն սկսել է մտածել դեռևս գիշերվանից և հուսով է, որ օրվա վերջին չի հիասթափեցնի, չնայած նշել է, որ իրենք վերջին օրերին ընտրակաշառք բաժանելու մի շարք դեպքեր են արձանագրել:

«Ընտրակաշառքները բաժանվում են իշխանության օգտին, և հենց հիմա Արեշում երիտասարդությունը ընտրողներին մեքենաներով ընտրատեղամասեր է բերում ու մտածում եմ՝  որտեղից են ճարում այդ երիտասարդությանը: 7/27 ընտրատեղամասում  թաղապետարանի  նախկին բարձրաստիճան աշխատակից լկտիություններ է ցուցաբերել: Ունենք կոնկրետ դեպքեր Ստեփանավանից՝ ընտանիքներ, այլ քաղաքներից բերում են լրացուցիչ ընտրացուցակներով քվեարկելու, ու արդեն ահազանգերը դառնում են մասսայական», – նշել է թեկնածուն:

Նա շեշտել է, որ պաշտոնյայի խախտման վերաբերյալ իրենք հաղորդում են ներկայացրել Կենտրոնական ընտրական հանձնաժողով և սպասում են արձագանքի:

Բագրատյանը ընգդծել է, որ կարևորը արդար ընտրություններն են, ու այդ պարագայում բացարձակապես կարևոր չէր լինի՝ ով կլինի հաղթողը:

«Կարևոր է, որ Հայաստանում հաղթեին», – ասել է թեկնածուն: