ԱԱԾ-ն հաստատեց. Սեդրակյանը մեղադրվում է Հայրիկյանի սպանությունը պատվիրելու մեջ

«Ազգային ինքնորոշում միավորում» կուսակցության առաջնորդ, քաղաքական  գործիչ Պարույր Հայրիկյանի  դեմ սպանություն  կատարելու  դեպքով ՀՀ ԱԱԾ քննչական վարչությունում քննվող քրեական գործով մարտի 5-ին  ՀՀ քր. օր-ի 34-305-րդ հոդվածի  հատկանիշներով նախատեսված հանցագործություն կատարելու համար մեղադրանք է առաջադրվել Վարդան Սեդրակյանին:

Նույն օրը վարույթ իրականացնող մարմինը միջնորդություն է ներկայացրել դատարան, նրա նկատմամբ  կալանքը որպես խափանման միջոց ընտրելու մասին: Երևանի Կենտրոն Նորք-Մարաշ  վարչական շրջանների  ընդհանուր իրավասության դատարանը բավարարել է միջնորդությունը և  Վարդան Սեդրակյանի հանդեպ խափանման միջոց կիրառել  կալանավորումը երկու ամիս ժամկետով:

Սեդրակյանին մեղադրանք է առաջադրվել Պարույր Հայրիկյանի սպանությունը պատվիրելու համար:

Նախաքննությունը շարունակվում է, ընթացքի մասին հանրությանը պարբերաբար կտեղեկացվի, հայտնում են ԱԱԾ մամուլի կենտրոնից:

Նշենք, որ մահափորձ կատարելու կասկածանքով ԱԱԾ-ն փետրվարի 7-ին ձերբակալել էր Խաչատուր Պողոսյանին և Սամվել Հարությունյանին, ովքեր նախկինում աշխատել են Վարդան Սեդրակյանի մոտ՝ զբաղվել են բնակարանի վերանորոգմամբ: Համաձայն քննությունն իրականացնող մարմնի, Պողոսյանն ու Հարությունյանն ինքնախոստովանական ցուցմունքներ են տվել: