Ծառերը կտրեցին. գյուղապետին պատժել են Սերժ Սարգսյանի օգտին ձայներ ապահովելո՞ւ համար

Արարատի մարզի Գոռավան համայնքի բնակիչները վրեժ են լուծել իրենց գյուղապետ Արսեն Բազիկյանից, գրում է «Ժողովուրդ» օրաթերթը՝ նշելով, որ առիթը եղել է գյուղում ՀՀ նախագահի ընտրությունների ժամանակ ՀՀԿ առաջնորդ Սերժ Սարգսյանի «հաղթանակը»:

«Ժողովուրդ»-ի աղբյուրները փոխանցում են, որ 2910 բնակիչ ունեցող այս գյուղի մեծամասնությունը փետրվարի 18-ին կայացած նախագահական ընտրություններին իր քվեն տվել է «Ժառանգության» առաջնորդ Րաֆֆի Հովհաննիսյանին, սակայն գյուղապետի «թեթև ձեռքով» Սերժ Սարգսյանին են «անցել» այդ ձայները:

Գյուղացիներն էլ օրերս նրան պատկանող 30 հա հողատարածքի ողջ ծառերը գիշերով կտրել են:

Թերթի թղթակիցը զրուցել է գյուղապետի հետ, ով հաստատել է ծառերը կտրելու լուրը, սակայն չի կապել դա ընտրությունների հետ:

«Չէ, նման բան չկա, ծառերն ընտրության հետ ոչ մի կապ չունեն: Ես ի՞նչ իմանամ ինչի համար են հատել, հետո էլ՝ ծառերը իմը չեն, ուրիշինն են, ծառերն իմ ախպորն են ու իրա ընկերոջը», – ասել է Բազիկյանը: