Home / Հայաստան / Արտահերթ ընտրություններ. Րաֆֆի Հովհաննիսյանը ընթերցեց իր առաջարկները

Արտահերթ ընտրություններ. Րաֆֆի Հովհաննիսյանը ընթերցեց իր առաջարկները

Այսօր Ազատության հրապարակում հրավիրած հանրահավաքի ժամանակ «Ժառանգություն» կուսակցության նախագահ Րաֆֆի Հովհաննիսյանը դրական է գնահատել Սերժ Սարգսյանի որոշումը խոսել իր կողմից ուղարկած առաջարկի մասին:

Ընդդիմության առաջնորդի խոսքով՝ իրենց մոտեցումն այն է, որ պետք է բոլոր տեսակի շփումները բաց և թափանցիկ լինեն՝ ժողովրդի աչքի առջև:

Այդ իսկ պատճառով Րաֆֆի Հովհաննիսյանն ընթերցել է իր առաջարկների երկու փաթեթ, որոնք խոստացել է հանրահավաքից հետո ուղարկել Սերժ Սարգսյանին:

Իր խոսքում Րաֆֆի Հովհաննիսյանն ընդգծել է, որ առաջարկների երկրորդ փաթեթը հնարավորություն է տալիս Սերժ Սարգսյանին շարունակել պաշտոնավարել որպես կեղծված նախագահ՝ չունենալով ժողովրդի քվեն:

«Նաև այդ հնարավորությունը պետք է տանք Ձեզ», – հայտարարել է ընդդիմության առաջնորդը:

Հովհաննիսյանի առաջին առաջարկը նախագահական արտահերթ ընտրությունների անցկացումն է:

Երկրորդ փաթեթի հիմնական պահանջն այս տարվա ընթացքում արտահերթ խորհրդարանական ընտրությունների անցկացումն է:

Նախքան դա անելը Րաֆֆի Հովհաննիսյանը պահանջում է.

– Ընտրական օրենսգրքում իրականացնել փոփոխություններ՝ վերացնելով մեծամասնական ընտրակարգը, թողնելով բացառապես համամասնականը:

– Թույլատրել ընտրություն կատարած քաղաքացիների ցուցակների հրապարակումը:

– Վերականգնել քաղաքական կուսակցական սկզբունքը կենտրոնական ընտրական և ընտրատարածքային ընտրական հանձնաժողովների ձևավորման համար:

– Այլ երկրում ապրող Հայաստանի քաղաքացիների քվեարկության ապահովում կամ նվազագույնն ընտրացուցակներներից նրանց անունների հանում:

– Առնվազն 5 մարզպետների աշխատանքից ազատում և այդ պաշտոններում ժողովրդի, հանձինս Րաֆֆի Հովհաննիսյանի ներկայացված մարդկանց նշանակում:

– Հիմնական ընտրակեղծարար քաղաքապետերի և գյուղապետերի աշխատանքից ազատում՝ օգտագործելով կառավարության լիազորությունները:

– Բոլոր ընտրակեղծարարների առանց բացառության, այդ թվում՝ մարզպետերի, քաղաքապետերի, կուսակցական պատասխանատուների, այլ պաշտոնյաների քրեական պատասխանատվության ենթարկում:

Րաֆֆի Հովհաննիսյանն առաջարկել է հետևյալ հաստատությունների ղեկավարների պաշտոններում նշանակել ժողովրդից՝ հանձինս Րաֆֆի Հովհաննիսյանի ներկայացրած մարդկանց. ՀՀ գլխավոր դատախազություն, Պետեկամուտների կոմիտե, Ազգային անվտանգության ծառայություն, Արտաքին գործերի նախարարություն, Կրթության և գիտության նախարարություն, Արդարադատության խորհուրդ, Վերահսկիչ պալատ, Հակակոռուպցիոն հանձնաժողով:

Երկրորդ փաթեթի եզրափակիչ դրույթի համաձայն, պայմանագիրը ենթակա է երկուստեք ստորագրման և դրանում ամրագրված դրույթներն անբեկանելի են մինչև արտահերթ խորհրդարանական ընտրությունների ավարտը:

Ընթերցելուց հետո Րաֆֆի Հովհաննիսյանն առաջարկներով նամակը դրեց ծրարի մեջ և մակագրեց՝ «Րաֆֆի Հովհաննիսյանից պարոն Սերժ Սարգսյանից»: