Epress.am Լուրեր Հայաստանից
ՀՀ երկրորդ նախագահ Ռոբերտ Քոչարյանի մամլո խոսնակ Վիկտոր Սողոմոնյանը վստահ է, որ ՌԴ Կոռուպցիայի դեմ պայքարի հասարակական խորհրդի հայտարարությունը, թե Քոչարյանը ՌԴ նախագահ Վլադիմիր Պուտինի «հովանավորությամբ» կարճ ժամանակահատվածում կարողացել է միլիոններ կուտակել ՀՀ-ի հաշվին, չի համապատասխանում իրականությանը: Այս մասին նա ասել է Galatv.am–ի հետ զրույցում՝ չցանկանալով անդրադառնալ այդ տեղեկատվությանը:
«Ես շատ ուրախ եմ նրանց համար: Ինչ անդրադառնամ, եթե այդտեղ կես գրամ ճշմարտություն անգամ չկա», – ասել է Սողոմոնյանը:
ՌԴ Կոռուպցիայի դեմ պայքարի հասարակական խորհրդի հասարակայնության հետ կապերի պատասխանատու Մարինա Գալյուչենկոն ավելի վաղ Aravot.am-ի հետ զրույցում ասել էր, որ իրենց տրամադրության տակ կան փաստաթղթեր, որոնք վկայում են Հայաստանի նախկին և ներկա բարձրաստիճան պաշտոնյաների յուրացումների ու չարաշահումների մասին:
Նրա խոսքով՝ այդ փաստերը մոտ օրերս ներկայացվելու են ՌԴ բարձրաստիճան այրերին:
«Դա արվելու է բացառապես պաշտոնական եղանակով: Մենք դա չենք թաքցնելու, մանավանդ, որ խոսվում է նաև ՌԴ բարձրաստիճան չինովնիկների մասին, ովքեր «հովանավորել» են Հայաստանից կեղտոտ փողերի դուրս բերման հարցում: ՌԴ-ն հետաքրքրված է այդ բացահայտումների և Հայաստանից գողացած գումարների վերադարձի հարցում, որպեսզի այդ գումարները «աշխատեն» ձեր երկրում՝ բնակչության սոցիալական խնդիրների լուծման համար»,- ասել էր Մարինա Գալյուչենկոն: Փաստաթղթում շրջանառվում էր նաև Ռոբերտ Քոչարյանի անունը: