Home / Հայաստան / Ոստիկանները կոշիկները մաքրում էին ակտիվիստի շալվարի վրա. պատմում են երթի մասնակիցները

Ոստիկանները կոշիկները մաքրում էին ակտիվիստի շալվարի վրա. պատմում են երթի մասնակիցները

Քաղաքացիական ակտիվիստներ Եղիա Ներսիսյանը, Տաթևիկ Մայիլյանը, Գևորգ Սաֆարյանն ու Աննա Դավթյանը նշում են, որ ապրիլի 9-ին իրենց դեմ ուժ է կիրառվել ոստիկանների կողմից, եղել է անմարդկային վերաբերմունք: Այսօր լրագրողների հետ հանդիպմանը Գևորգ Սաֆարյանը նշել է, որ ոստիկաններն իրենց սադրիչ գործողությունները սկսել էին առավոտյան ժամը 9-ից, երբ մի խումբ դասադուլավոր երիտասարդներ հավաքվել էին  ԵՊՀ կենտրոնական շենքի դիմաց:

«Երբ Րաֆֆին հարթակից խոսեց և ասաց` գնացեք, ժամը 6-ին վերադարձեք, դրանից հետո մենք որոշեցինք ընդհամենը 30 երիտասարդով քայլել Բաղրամյան: Շրջափակեցին` ասելով, որ դուք ցուցարարներ եք ու չեք կարող բարձրանալ», – ոստիկանների հետ վիճաբանության պատճառը ներկայացրել է Տաթևիկ Մայիլյանը:

Ակտիվիստները նշել են, որ մոտ 30 երիտասարդի դեմ մի քանի հարյուր ոստիկան էր կանգնած:

«Բաղրամյան 26 սիմվոլ ա, մեր պետականության սիմվոլն ա, որը վերածվել ա քրեաօլիգարխիկ համակարգի, վախի սիմվոլի: Իսկ մենք գնում էինք այդ քրեաօլիգարխիկ սիմվոլի «պապային» մեր` կեղծիքին չհնազանդվելու մասին տեղեկացնելու», – Բաղրամյան 26 գնալու նպատակը մեկնաբանել է Գևորգ Սաֆարյանը:

Երիտասարդները նշել են, որ իրենց թույլ չեն տվել բարձրանալ դեպի նախագահական նստավայր, սկսվել են ձեռբակալությունները:

«Ոստիկանության կողմից հայհոյանքներ, սադրանքներ, ոստիկանությունը ցույց տվեց իր լպիրշության աստիճանը: Ոստիկանները մաքրում էին իրենց կոշիկները ակտիվիստի շալվարի վրա, ով նստել էր Բաղրամյան-Դեմիրճյան խաչմերուկին՝ դրսևորելով անհնազանդություն», – ասել է Տաթևիկ Մայիլյանը:

Ոստիկաններն ակտիվիստներին միայն ասել են, որ վերջիններս չեն կատարում իրենց օրինական պահանջները, իսկ երբ ակտիվիստներից մեկը հարցրել է, թե ինչ օրինական պահանջի մասին է խոսքը, որը ինքը չի կատարել, պատասխան չի հնչել:

«Ասացին՝ բերման չենք ենթարկել, վարչական կալանքի տակ ենք վերցրել: Երիտասարդների նկատմամբ սահմանվել է տույժ՝ 50.000 ՀՀ դրամի չափով», – ասել է Եղիա Ներսիսյանը: